އދ އަތޮޅު ޒުވާނުންގެ 12 ވަނަ ފުޓްބޯޅަ މުބާރާތުގެ ޗެމްޕިއަންކަން، މިފަހަރުވެސް މަހިބަދޫއިން ހޯދައި ތަށި ދިފާއުކޮށްފި އެވެ.

ދިވެހިރާއްޖޭގެ މިނިވަންދުވަސް އަތޮޅު ފެންވަރުގައި އދ. މަހިބަދޫ ގައި ފާހަގަކުރުމުގެ ގޮތުން ބޭއްވުނު ކުޅިވަރުތަކުގެ ތެރެއިން، ޒުވާނުންގެ ފުޓްބޯޅަ މުބާރާތުގެ ޗެމްޕިއަންކަން މަހިބަދޫ ޓީމުން ހޯދާފައި ވަނީ ފައިނަލް މެޗުގައި މާމިގިލި ޓީމާއި ވާދަކޮށް 4-0 ގެ ނަތީޖާއަކުންނެވެ. 

ވާދަވެރި ކުޅުމެއް ފެނިގެން ދިޔަ މި މެޗުގައި ފުރަތަަމަ ހާފު ނިމެން ކައިރިވެފައި ވަނިކޮށް މަހިބަދޫއަށް އެ ޓީމުގެ ފުރަތަަމަ ގޯލު ކާމިޔާބު ކޮށްދީފައިވަނީ، މިދުހަތު ފަހުމީ އެވެ. އެއަށްފަހު ދެވަނަ ހާފުގައި ނަސޫހު ރަޝީދު ކާމިޔާބު ކޮށްދިން ރީތި ގޯލަކާއި އެކު މަހިބަދޫއިން ލީޑު ފުޅާ ކޮށްފައި ވަނިކޮށް، އެ ޓީމަށް ކުޅެން އެރި ދެ ބަދަލު ކުޅުން ތެރިން ކަމުގައިވާ ސުޢައިދު ސަޢީދު އާއި ނާއިލް ވަނީ މެޗުގެ ސްކޯރ 4-0 އަށް ބަދަލުކޮށް ތަށި ޔަގީންކޮށްފައެވެ. ނާއިލްގެ ލަނޑު ކާމިޔާބު ކޮށްފައިވަނީ، މެޗުގެ 90 މިނެޓް ހަމަވެ، އިތުރު ވަގުތުގެ ކުޅުމުގެ ތެރެއިންނެވެ. 

މުބާރާތް ނިމުމުން އަތޮޅު ޒުވާނުންގެ 12 ވަނަ ފުޓްބޯޅަ މުބާރާތަށްފަހު މުބާރަތުގެ އެކިއެކި މަގާމްތަކަށް އައި ފަރާތްތަކާއި އެކި ގޮތްގޮތުން އެހީތެރިކަން ފޯރުކޮށްދިން ފަރާތްތަކުގެ އަގުވަޒަންކޮށްފައިވެއެވެ.

އެންމެ މޮޅު ގޯލް ކީޕަރު, މަހިބަދޫ ޓީމުގެ ޖަރޒީ ނަންބަރު 18 އަޙްމަދު ނަައުފަލް، 

އެންމެ މޮޅު ޑިފެންޑަރ، މަންދޫ ޓީމުގެ ޖަރޒީ ނަންބަރު 03 މުޙައްމަދު ފިޒާލް

މުބާރާތުގެ އެންމެ މޮޅު މިޑްފީލްޑަރ، މަހިބަދޫ ޓީމުގެ ޖަރޒީ ނަންބަރު 37 މުޙައްމަދު ސާރިޙް

އެންމެ މޮޅު ފޯވާޑް، މަހިބަދޫ ޓީމުގެ ޖަރޒީ ނަންބަރު 38 މުޙައްމަދު ޖުނައިދު

އެންމެ އުއްމީދީ ކުޅުންތެރިޔާ،  ހަންޏާމީދޫ ޓީމުގެ ޖަރޒީ ނަންބަރު 17 މިންދާދު ޢަބްދުލްޙަސީބް

މުޅި މުބާރާތުގެ އެންމެ ގިނަ ލަނޑުޖެހި ކުޅުންތެރިން، މަހިބަދޫ ޓީމުގެ މުޙައްމަދު ޖުނައިދު، އަދިއެ ޓީމުގެ ޖަރޒީ ނަންބަރު 23 އާދަމް ނާއިލް.

މުޅި މުބާރާތުގެ އެންމެ މޮޅު ކުޅުންތެރިޔާ، މަހިބަދޫ ޓީމު ޖަރޒީ ނަންބަރު 37 މުޙައްމަދު ސާރިޙް

މުބާރާތުގެ އެންމެ މޮޅު ކުޅުންތެރިޔާ، މަހިބަދޫ ޓީމު ޖަރޒީ ނަންބަރު 37 މުޙައްމަދު ސާރިޙް

މި މުބާރާތުގެ ޗެމްޕިއަން ޓީމު، މަހިބަދޫ ޓީމަށް އަތޮޅު ކައުންސިލްގެ ފަރާތުން 35،000 ރުފިޔާގެ ފައިސާގެ އިނާމާއި، މެޑަލް އަދި ޝީލްޑް ހަވާލުކޮށްފައިވާއިރު، މުބާރާތުގެ ރަނަރއަޕް ޓީމް މާމިގިލީ ޓީމަށް 20،000 ރުފިޔާގެ ފައިސާގެ އިނާމާއި، މެޑަލް އަދި ޓްރޮފީވަނީ ހަވާލުކޮށްފައެވެ. މިމުބާރާތުގެ ފެއަރ ޕްލޭ ޓީމަކަށް ހޮވިފައިވަނީ ހަންޏާމީދޫ ޓީމެވެ.

އަތޮޅު ޒުވާނުންގެ 12 ވަނަ ފުޓްބޯޅަ މުބާރާތުގެ ޗެމްޕިއަންކަން ފާއިތުވި އަހަރުވެސް ހޯދާފައިވަނީ މަހިބަދޫއިން ނެވެ. މިފަހަރު ހޯދި ތައްޓާއި އެކު، އަތޮޅު ޒުވާނުންގެ 12 މުބާރާތުގެ ތެރެއިން 9 މުބާރާތުގެ ޗެމްޕިއަންކަން އެ ރަށު ޓީމުން މިވަނީ ހޯދައި, އަތޮޅުގެ ފުޓްބޯޅައިގެ ޗެމްޕިއަނުންގެ ގޮތުގައި ވިދާލާފައެވެ.