އަރަބި ކުލަބް ޗެންޕިްއަންސް ކަޕްގެ ގްރޫޕް ސީގައި ޓިއުނީޝިޔާގެ މޮނަސްޓަރ އާއި ސައުދީގެ އަލް ނަސްރު ވާދަކުރި މެޗު 4-1 ގެ ނަތީޖާއަކުން އަލް ނަސްރު ކާމިޔާބުކޮށްފިއެވެ.

މުބާރާތުގެ ގްރޫޕް ސީގައި އަލް ނަސްރު ކުޅުނު ފުރަތަމަ މެޗުގައި ސައުދީ ޕްރޮފެޝަނަލް ލީގުގެ އަލް ޝަބާބު އާއި ވާދަކޮށް 0-0 ގެ ނަތީޖާއަކުން އެއްވަރުވެފައިވާއިރު، މިރޭގެ މެޗަކީ އެޓީމުގެ ކޯޗު ލުއިސް ކާސްޓްރޯގެ އިރުޝާދުގެ ދަށުން އެޓީމު މޮޅުވި ފުރަތަމަ މެޗެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މި މެޗުގައި ފުރަތަަމަ ލަނޑުޖަހައި ކުރިހޯދީ އަލް ނަސްރު އިންނެވެ. މި ލަނޑު ފުރަތަމަ ހާފުގެ 42 ވަނަ މިނެޓުގައި ކާމިޔާބުކޮށްދިނީ ބްރެޒިލްގެ ފޯވާޑް އެންޑަސަން ޓަލިސްކާ އެވެ.

Advertisement

މިއީ އެޓީމުގެ މިޑްފިލްޑަރު އަބްދުލްރަހްމާން ޣަރީބު މުޅިން ހުސްކޮށްލާފައި ޖައްސާލި ބޯޅައެއް މޮނަސްޓަރ ގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ ތިރިތިރިން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ.

މެޗުގެ ދެވަަނަ ހާފުގައި މޯނަސްޓަރ އިން މެޗުގެ ނަތީޖާ އެއްވަރުކުރި ލަނޑަކީ ފަހުހާފުގެ 66 ވަނަ މިނެޓުގައި އަލް ނަސްރުގެ ޑިފެންޑަރު ޢަލީ އަލް އުޖާމީ އަތުން ބައިކޮޅަށް ވަން ލަނޑެކެވެ. މިއީ މޮނަސްޓަރ ގެ ކީއްޕަރު ކުރިއަށް ކުޅުނު ދިގު ބޯޅައެއް ބޮލުން ކީއްޕަރަށް ޖައްސާލަން އުޅުމުގެތެރޭގައި ބައިކޮޅަށް ވަން ލަނޑެކެވެ.

މި މެޗުގައި އަލް ނަސްރުން ދެވަނަ ފަހަރަށް ލީޑު ހޯދި ލަނޑު 74 ވަނަ މިނެޓުގައި ކާމިޔާބުކޮށްދިނީ ކެޕްޓަން ކްރިސްޓިއާނޯ ރޮނާލްޑޯ އެވެ. މިއީ އެޓީމުގެ ޑިފެންޑަރު އައްސުލްޠާން އަލް ޣަންނަމް މަތިމަތިން ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މެޗު ނިމެން ދެ މިނިޓަށްވެފައި ވަނިކޮށް އަލް ނަސްރުގެ ތިންވަނަ ލަނޑު ކާމިޔާބުކޮށްދިނީ ޑިފެންޑަރު އަލް އަމްރީ އެވެ. މިއީ ރޮނާލްޑޯ ބޮލުން ފޮނުވާލި ހަމަލާއެއް ކީޕަރު އަތުގައި ޖެހިފައި ނުކުތް ވަގުތު މުޅިން ހުރެ ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި އޭގެ ދެ މިނެޓު ފަހުން ޓަލިސްކާ ތަނަވަސްކޮށްދިން ފުރުސަތެއްގައި ޢަބްދުލްޢަޒީޒް އަލް އަލްވާ ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 4-1 އަށް ބަދަލުކޮށްދީފައެވެ.

މިލަނޑާއެކު މެޗުގެ ކުޅުން ނިމިގެންދިޔައީ 4-1 ގެ ނަތީޖާއަކުން އަލް ނަސްރު ކުރީގައި އޮވެގެންނެވެ. އަދި މި މެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ހަތަރު ޕޮއިންޓް ހަމަކޮށް ގުރޫޕް ސީގެ އެއްވަނައިގައި މިވަގުތު އޮތީ އަލް ނަސްރު އެވެ.

މި މެޗުން ބަލިވި މޮނަސްޓަރ ވަނީ ކުޅުނު ދެ މެޗުން ބަލިވެ ބާކީ އެއް މެޗު އޮއްވައި މުބާރާތުން ކަޓާފައެވެ.