ކުރީގެ ރައީސް އަބްދުالله ޔާމީން އަބްދުލްގައްޔޫމް ގެ މަންމާފުޅު، މަރުހޫމް ފާތިމަތު ހަސަން އެދިލައްވަމުން ދިޔައީ، ދަރިކަލުން، ރައީސް ޔާމީން ޖަލުން މިނިވަންވެ ވަޑައިގެން ގެއަށް ވަޑައިގެންނެވުމަށް ކަމަށް، އެމަނިކުފާނުގެ ދަރިކަލުން ޒޭން ޔާމީން ވިދާޅުވެއްޖެއެވެ. 

ޒޭން ޔާމީން ގެ މާމާފުޅު، އަދި ރައީސް ޔާމީންގެ މަންމަ، ގިނަ ދުވަސްތަކެއް ވަންދެން އާލާސްކަންފުޅާއި އުޅުއްވުމަށްފަހު އިއްޔެގެ ހެނދުނުގެ ވަގުތެއްގައި ވަނީ އަވަހަރާވެފައެވެ. އަވަހާރަވީއިރު އުމުރުންވީ 86 އަހަރެވެ. 

ޒޭން ގެ މާމަ އަވަހާރަވުމާއި ގުޅިގެން، އޭނާ ފޭސްބުކުގައި ލިޔުއްްވާފައިވާ އަސަރުން ފުރިގެންވާ ލިޔުން ކޮޅެއްގައި ވަނީ މާމަގެ ހަނދާންތަކާއި ޒިކުރާ އައު ކުރައްވާފައެވެ. 

Advertisement

އެގޮތުން ވިދާޅުވީ، މާމަ އަކީ މާމަ ދަރިންނާއި މުނި މާމަ ދަރިންނަށްވެސް ހެޔޮ، އަބަދުވެސް ހިނިތުންވުމާއި އެކު ބައްދަލު ކުރައްވާ ހިތްހެޔޮ ކަނބަލެއް ކަމަށެވެ. މާމަ ދެއްވާފައިވާ އަގުހުރި ފިލާވަޅުތަކާއި ދަރުސްތަކުގެ ޒިކުރާ އައު ކުރަމުން ޒޭން ވަނީ، ހިތްވަރާއި، ހިކުމަތާއި، ކެތްތެރިވާން އެންމެނަށްވެސް ދަސްކޮށްދިނީ މާމަ ކަމަށް ވިދާޅުވެފައެވެ. 

ޒޭން އިތުރަށް ވިދާޅުވީ، އޭނާގެ މާމައަށް 86 އަހަރު ފުރުނު އުފަންދުވަހުގައި މާމައާއި އެކުގައި އޭނާވެސް ހުންނެވި ކަމަށާ، އެދުވަހުވެސް މާމަ އެދެމުންދިޔައީ، ބައްޕާފުޅު، ރައީސް ޔާމީން ޖަލުން މިނިވަންވެ ވަޑައިގެން އެ އެންމެނާއި އެކު ގޭގައި ވުމަށް ކަމަށެވެ. މާމަގެ ވަކިވުމަކީ އެންމެންވެސް ނުހަނު ހިތާމަކޮށް ކަރުނަ އަޅާ ކަމެއް ކަން ފާހަގަކުރައްވައި ޒޭން ވަނީ މާމަގެ އެންމެ ފަހު ވަގުތު ތަކުގައި، ބައްޕާފުޅު، ރައީސް ޔާމީން މާމަ އާއި އެކު ވުމަށް އިންތިހާއަށް އެދެވުނު ކަމަށް ވިދާޅުވެފައެވެ. 

ޔާމީންގެ މަންމާފުޅު އަވަހާރަވީއިރު ދިރިއުޅުއްވަމުން ގެންދެވީ ރައީސް ޔާމީންގެ ކޮއްކޯފުޅު މުސްލިމާ އަބްދުލް ޤައްޔޫމް އަރިހުގައި ސްރީލަންކާގައެވެ. 

ފާތިމަތު ހަސަންގެ ޖަނާޒާ ރޭގެ އިޝާ ނަމާދަށްފަހު ބާއްވާފައިވާއިރު، ޖަލުގައި ހުންނަވަން ޖެހިވަޑައިގެންނެވުމުން ޖަނާޒާގައި ރައީސް ޔާމީނަށް ބައިވެރިވުމުގެ ފުރުސަތެއް ނުލިބުނެވެ.