އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް، ރައީސް އަބްދުالله ޔާމީން އަބްދުލްގައްޔޫމްގެ ކެންޑިޑެސީ ފޯމާއިމެދު ނިންމާ ގޮތެއް ކުރިއަށް އޮތް 24 ގަޑިއިރު ތެރޭގައި އަންގާނެ ކަމަށް އިލެކްޝަންސް ކޮމިޝަނުން ބުނެފިއެވެ. 

މިއަހަރުގެ ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީގެ ފަރާތުން ވާދަކުރައްވާ ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ކެންޑިޑެސީ ފޯމު އިލެކްޝަންސް ކޮމިޝަނަށް މިއަދު ވަނީ ހުށަހަޅާފައެވެ.

ރަސްމީ ހަރަކާތަކާއި އެކު ރައީސް ޔާމީން ގެ ކެންޑިޑެސީ ފޯމު ހަވާލު ކުރުމަށް ދަރުބާރުގެއަށް މިއަދު އިދިކޮޅު ބައެއް އިސް ފަރާތްތަކާއި ރައީސް ޔާމީންގެ ސަޕޯޓަރުން ވަޑައިގެންފައިވާއިރު، އެ ފޯމު، އިލެކްޝަންސް ކޮމިޝަންގެ ރައީސް ފުއާދު ތައުފީގު އަށް އަރުވާފައިވަނީ ޕީޕީއެމްގެ ސެކެރެޓަރީ ޖެނެރަލް މުހައްމަދު ތޮލާލް އެވެ. 

ރައީސް ޔާމީން ގެ ކެންޑިޑެސީ ފޯމު ހުށަހެޅުމަށްފަހު، އިލެކްޝަންސް ކޮމިޝަން (އީސީ)އިން އެކަމާއި ގުޅޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، އީސީގެ ނައިބު ރައީސް އިސްމާއީލް ހަބީބު ވިދާޅުވީ، އިލެކްޝަންސް ކޮމިޝަންގެ ގަވާއިދުގައިވާ ގޮތުން، ރިޔާސީ ކެންޑިޑޭޓް ގެ ފޯމު ހުށަހަޅާތާ 48 ގަޑިއިރު ތެރޭގައި، ފޯމާއި ބަލައިގަތުމާއިމެދު ނިންމާ ގޮތެއް އަންގަން ޖެހޭ ކަމަށެވެ. 

އެހެންނަމަވެސް، އެ ކޮމިޝަންގެ މެންބަރުން ނިންމާފައިވަނީ އެ މުއްދަތު 48 ގަޑިއިރަށް ލަސް ނުކޮށް، 24 ގަޑިއިރު ތެރޭގައި، ރައީސް ޔާމީން ގެ ކެންޑިޑެސީ ފޯމާއި މެދު ނިންމާ ގޮތެއް އެންގުމަށް ކަމަށެވެ. 

"[އެހެން ނަމަވެސް] އިލެކްޝަންސް ކޮމިޝަނުން ނިންމާފައި އޮތީ އެ 48 ގަޑިއިރު އެގޮތަށް ނުނަގާ އިރާދަ ކުރެއްވިއްޔާ އެ 24 ގަޑިއިރު ފުރިހަމަވުމުގެ ކުރިން ކެންޑިޑަސީ ފޯމާމެދު އިލެކްޝަންސް ކޮމިޝަނުން ނިންމާ ގޮތެއް އަޅުގަނޑުމެން އަންގާނަން." ހަބީބް ވިދާޅުވިއެވެ.

އެހެންކަމުން ކުރިއަށް އޮތް 24 ގަޑި އިރުތެރޭގައި ރައީސް ޔާމީން ގެ ފަރާތުން ހުށަހަޅާފައިވާ ލިޔެކިޔުންތަކާއި، އެނޫން ކަންކަމަށް ބަލައި ކެންޑިޑެސީ އާއި މެދު ގިތެއް ނިންމައި އެކަން އަންގާނެ ކަމަށް ހަބީބު ވިދާޅުވި އެވެ. 

"އިންތިހާބަށް ކުރިމަތިލުމަށް އެދޭ މީހާ އިންތިހާބުގެ ޝަރުތުތައް ފުރިހަމަވޭތޯ ނޫނީ ނޫންތޯ ގާނޫނީ ގޮތުން އިލެކްޝަންސް ކޮމިޝަނުން ބަލާނެ. އިލެކްޝަންސް ކޮމިޝަންގެ ލީގަލް ޓީމުން ދިރާސާ ކުރުމަށްފަހުގައި ނިންމާ ގޮތެއްގެ މަތިން އިރާދަ ކުރެއްވިއްޔާ 24 ގަޑިއިރު ފުރިހަމަވުމުގެ ކުރިން ޖަވާބު އަރުވާނަން." ހަބީބް ވިދާޅުވިއެވެ.

ހަބީބް  އިތުރަށް ވިދާޅުވީ އިލެކްޝަންސް ކޮމިޝަން ނިންމި ގޮތާ މެދު ހިތްހަމަނުޖެހޭ ނަމަ، އިލެކްޝަންސް ކޮމިޝަނަށް ފޯމު ހުށަހަޅުއްވާތާ 48 ގަޑިއިރު ފަހުން ފަސް ދުވަސް ތެރޭ އެ މައްސަލަ ސުޕްރީމް ކޯޓަށް ހުށަހަޅުއްވަން ޖެހޭނެ ކަމަށެވެ.

"ދެން ސުޕްރީމް ކޯޓަށް މައްސަލަ ހުށަހެޅުއްވީ ހަތް ދުވަހުގެ ތެރޭގައި އެ މައްސަލަ ނިންމުމަށް ގާނޫނުން ލާޒިމް ކުރޭ." ހަބީބް ވިދާޅުވިއެވެ.

ރައީސް ޔާމީންގެ ކެންޑިޑެސީ ފޯމު ހުށަހެޅުމަށް ދަރުބާރުގެއަށް ދިޔަ މަގުމަތީގައި މީޑިއާއަށް ދެއްވި ބަސްދީގަތުމެއްގައި ރައީސް ޔާމީން ގެ ނާއިބު ރައީސް ޑރ މުހައްމަދު ޖަމީލް އަހުމަދު ވަނީ، ރައީސް ޔާމީންގެ ކެންޑިޑެސީ ފޯމް އިލެކްޝަންސް އިން ބަލައި ގަނެ، އެމަނިކުފާނަށް ރިޔާސީ އިންތިހާބުގައި ވާދަކުރެވޭނެ ކަމުގެ ޔަގީންކަން އޮތް ކަމަށް ވިދާޅުވެފައެވެ.