އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އީގައި މިއަދު މެންދުރު ކުޅެވުނު މެޗުގައި ޕޯޗުގަލް އާއި އެމެރިކާ ވާދަކުރި މެޗު 0-0 ގެ ނަތީޖާއަކުން ދެޓީމް އެއްވަރުވެ، އެންމެ ފަހުގެ ޗެމްޕިއަން އެމެރިކާ މުބާރާތުގެ ދެވަނަ ބުރުން ޖަގަ ހޯދައިފިއެވެ.

މުބާރާތުގެ ޗެމްޕިއަން ހަތަރު ފަހަރަށް ހޯދާފައިވާ އެމެރިކާ އާއި ދެކޮޅަށް، މި މުބާރާތުގައި ފުރަތަަމަ ފަހަރަށް ވާދަކުރި ޕޯޗުގަލް އިން ވަނީ ރަގަޅު ކުޅުމެއް ދާއްކާފައެވެ. އެގޮތުން މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ ވެސް ޕޯޗުގަލް އިންނެވެ. ނަމަވެސް އެޓީމަށް ލިބުނު ފުރުސަތުތަކުގެ ބޭނުން ނުކުރެވި، ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި އެމެރިކާ އިން އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކުރި ނަމަވެސް މިހާފުގައި ވެސް ދެޓީމުން ކުރެ އެއްވެސް ޓީމަކަށް ލިބުނު ފުރުސަތު ތަކުގެ ބޭނުން ނުކުރެވި، މެޗުގެ ކުޅުން ނިމިގެންދިޔައީ 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މި މެޗުން ލިބުނު އެއް ޕޮއިންޓާއެކު ކުޅުނު ތިން ފަސް ޕޮއިންޓް ހަމަކޮށް ގްރޫޕުގެ ދެވަނަ ޓީމުގެ ގޮތުގައި އެމެރިކާ ދެވަނަ ބުރުން ޖަގަ ހޯދިއިރު، ޕޯޗުގަލް މުބާރާތް ނިންމާލީ ހަތަރު ޕޮއިންޓާއެކު ގްރޫޕްގެ ތިންވަނައިގައެވެ.