އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ޑީގައި މިއަދު ހަވީރު ކުޅެވުނު މެޗުގައި ފަސޭހަކަމާއި އެކު ޗައިނާ ބަލިކޮށް ގުރޫޕްގެ އެއްވަނަ ޓީމުގެ ގޮތުގައި އިންގްލެންޑުން މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފިއެވެ.

މުބާރަތުގެ ފުރަތަަމަ ދެމެޗުގައި އިންގްލެންޑްގެ ފަރާތުން އާދައިގެ ކުޅުމެއް ފެނިގެންދިޔައިރު، މި މެޗުގެ ފުރަތަަމަ ހާފުގައި ފެނިގެން ދިޔައީ މުޅިން ތަފާތު އިންގްލެންޑެކެވެ. އެގޮތުން މެޗުގެ ފުރަތަަމަ ހާފުގައި އެޓީމުން ތިން ލަނޑުގެ ލީޑެއް ނެގިއިރު، މުޅި ހާފުގައި ވެސް އެޓީމުގެ ފަރަތުން ވަނީ ތަފާތު މޮޅު ކުޅުމެއް ފެނިގެން ގޮސްފައެވެ.

މެޗު ފެށިގެން ހަތަރުވަނަ މިނެޓުގައި އިންގްލެންޑުން މެޗުގެ ލީޑު ހޯދިއިރު، މި ލަނޑު ކާމިޔާބުކޮށްދިނީ އެޓީމުގެ އާސެނަލް ފޯވާޑް އެލެސިއާ ރޫސޯ އެވެ. މިއީ އެޓީމުގެ ޗެލްސީ ފޯވާޑް ލޮރެން ޖޭމްސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އެޓީމުގެ ދެވަނަ ލަނޑު ފުރަތަމަ ހާފުގެ 26 ވަނަ މިނެޓުގައި ކާމިޔާބުކޮށްދިނީ މެންޗެސްޓާ ސިޓީގެ ފޯވާޑް ލޮރެން ހެމްޕް އެވެ. މިއީ ވެސް ލޮރެން ޖޭމްސް ތަނަވަސްކޮށްދިން ފުރުސަތަކުން އޭނާ ކާމިޔާބުކޮށްދިން ލަނޑެކެވެ.

Advertisement

މި މެޗުގައި އިންގްލެންޑް އިން ކާމިޔާބުކުރި ތިންވަނަ ލަނޑު ފުރަތަމަ ހާފުގެ 41 ވަނަ މިނެޓުގައި ކާމިޔާބުކޮށްދިނީ މިމެޗުގައި މޮޅު ކުޅުމެއް ދެއްކި ޗެލްސީގެ ފޯވާޑް ލޮރެން ޖޭމްސް އެވެ. އަދި މިހާފުގެ އިތުރު ވަގުތުގެ ތެރޭގައި ލޮރެން ޖޭމްސް އިތުރު ލަނޑެއް ކާމިޔާބު ކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން އިންގްލެންޑް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޗައިނާ އިން އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކުރިއެވެ. އަދި ދެވަނަ ހާފުގެ 57 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މި ލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ޝުއާން ވަންގް އެވެ.

ނަމަވެސް އޭގެ އަށް މިނެޓް ފަހުން ލޮރެން ޖޭމްސް ވަނީ ލަނޑެއް ކާމިޔާބުކޮށް އަނެއްކާވެސް އިންގްލެންޑަށް ތިން ލަނޑުގެ ލީޑެއް ހޯދައިފީފައެވެ. އަދި މެޗުގެ 77 ވަނަ މިނެޓުގައި ލޮރެން ޖޭމްސް ތަނަވަސްކޮށްދިން ފުރުސަތަކުން އެޓީމުގެ ފަސްވަނަ ލަނޑު ކާމިޔާބުކޮށްދިނީ މެންޗެސްޓާ ސިޓީގެ ފޯވާޑް ކްލޯއީ ކެލީ އެވެ.

މި މެޗުގައި އިންގްލެންޑް އިން ކާމިޔާބުކުރި ހަވަނަ ލަނޑު ފަހުހާފުގެ 84 ވަނަ މިނެޓުގައި ކާމިޔާބުކޮށްދިނީ އެސްޓަންވިލާގެ ފޯވާޑް ރޭޗަލް ޑޭލީ އެވެ. މި ލަނޑާއެކު މެޗުގެ ކުޅުން ނިމިގެންދިޔައީ 6-1 ގެ ނަތީޖާއަކުން އިންގްލެންޑް ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ތިން މެޗުން 9 ޕޮއިންޓް ހަމަކޮށް، ގްރޫޕްގެ އެއްވަނަ ޓީމުގެ ގޮތުގައި އިންގްލެންޑުން މުބާރާތުގެ ދެވަނަ ބުރުގެ ފުރުސަތު ހޯދިއިރު، މި މެޗުން ބަލިވި ޗައިނާ މުބާރަތް ނިންމާލީ ކުޅުނު ތިން މެޗުން ލިބުނު ތިން ޕޮއިންޓާއެކު ގްރޫޕްގެ ތިންވަނައިގައެވެ.