އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ޑީގައި 2-0 ގެ ނަތީޖާއަކުން ހައިޓީ ބަލިކޮށް 1995 ވަނަ އަހަރަށް ފަހު ފުރަތަމަ ފަހަރަށް ޑެންމާކް ވޯލްޑްކަޕުގެ ދެވަނަ ބުރަށް ޖާގަހޯދައިފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ވަރަށް ކުރީކޮޅު ޑެންމާކް އިން ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މި މެޗުގައި ޑެންމާކް އިން ލީޑު ނެގީ ފުރަތަމަ ހާފުގެ 22 ވަނަ މިނެޓުގައެވެ. މިއީ ހައިޓީގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ޑެންމާކަށް ދިން ޕެނަލްޓީއެކެވެ. މި ލަނޑު އެޓީމަށް ކާމިޔާބުކޮށްދިނީ ޑެންމާކް ޓީމުގެ އޯލްރައިޓް ޓޮޕް ސްކޯރާ ޕަނީލް ހާޑާ އެވެ. އަދި މިއީ މި މުބާރާތުގައި މިހާތަނަށް ފެނިގެންދިޔަ 100 ވަނަ ލަނޑެވެ.

މިލަނޑާއެކު މެޗުގެ ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޑެންމާކް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔަ މިމެޗުގައި ޑެންމާކް އިން ކާމިޔާބުކުރި ދެވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ސެން ޓްރޮއެލްސްގާޑް އެވެ. މިއީ އެޓީމުގެ ފޯވާޑް މިލް ޖޭޖެލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ޑެންމާކް ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ކުޅުނު ތިން މެޗުން ޑެންމާކަށް ހަ ޕޮއިންޓް ލިބިފައިވާއިރު، 28 އަހަރުގެ ފަހުން ވޯލްޑް ކަޕްގެ ދެވަނަ ބުން އެޓީމު ޖާގަ ހޯދީ ގްރޫޕް ޑީގެ ދެވަނަ ޓީމުގެ ގޮތުގައެވެ. އަދި މި މެޗުން ބަލިވި ހައިޓީ މުބާރާތް ނިންމާލީ ކުޅުނު ތިން މެޗުން ވެސް ބަލިވެ ގްރޫޕްގެ ފުލުގައި އޮވެއެވެ.

މުބާރާތުގެ ދެވަނަ ބުރުގައި ޑެންމާކް ވާދަކުރަން ޖެހުނީ ގްރޫޕް ބީގެ އެއްވަނަ އޮސްޓްރޭލިޔާ އާއި ދެކޮޅަށް އަދި މި ގުރޫޕްގެ އެއްވަނަ ހޯދި އިންގްލެންޑް ނުކުންނާނީ ގްރޫޕް ބީގެ ދެވަނަ ހޯދި ނައިޖީރިއާ އާއި ދެކޮޅަށެވެ.