އިންޑިޔާގެ ގުރްގްރަމް ކިޔާ އަވަށެއްގެ މިސްކިތަކަށް ގެއްލުންދިން ހިންދޫން ތަކެއް އަންޖުމަން ޖަމާ މިސްކިތައް ގެއްލުންތަކެއް ދިނުމަށްފަހު އެމިސްކިތުގެ އިމާމަށް އަނިޔާކޮށް މަރާލައިފިއެވެ.

މިހާދިސާގައި ނިޔާވެފައިވާ މީހަކީ މައުލާނާ ސާދް ކަމަށް ޕޮލިހުން ވަނީ ކަށަވަރުކޮށްދީފައެވެ. މިސްކިތައް ގެއްލުންދީ ސާދްއަށް އަނިޔާކުރި ތަނުގައި ތިބި އިތުރު ތިން މީހުންގެ ތެރެއިން އެކަކަށް ބޮޑެތި އަނިޔާތަކެއް ލިބިފައިވެއެވެ.

މިހާދިސާއާއި ގުޅިގެން މައުލޫމާތުދިން އިންޑިޔާގެ ފުލުހުންގެ އޮފިސަރަކު ވިދާޅުވެފައިވަނީ މިކަމުގައި 60 އަކަށް މީހުން ބައިވެރިވެފައިވާކަމަށާއި، އަދި އެމީހުން މިސްކިތުގައި ހުޅުޖަހައި މިސްކިތަށް ގެއްލުންތަކެއް ދިން ކަމަށާއި މިސްކިތުގެ އިމާމުގެ ގައިގައި ތަޅައި އަނިޔާ ކުރުމުގެ ސަބަބުން އެނާ ނިޔާވެފައިވާކަމަށެވެ.

އެޕޮލިސް އޮފިސަރ އިތުރަށް ވިދާޅުވެފައިވަނީ މިކުށުގައި ޝާމިލްވާ އެއްބަޔަކު ހައްޔަރުކޮށްފައިވާ ކަމަށާއި އެބައިމީހުނާއި ދެކޮޅަށް އެފްއާރްއައި ރެޖިސްޓަރ ކޮށްފައިވާ ކަމަށެވެ. އަދި މައްސަލަ ތަހްޤީޤު ކުރަމުންދާ ކަމަށް އޭނާ ވިދާޅުވެފައިވެއެވެ.

މިހާދިސާގައި އަންޖުމަން ޖަމާ މަސްޖިދް އެއްކޮށް ވަނީ އަންދާލައިފައެވެ.

މިކަމުގައި ޝާމިލްވާ ބަޔަކު ހައްޔަރު ކުރިނަމަވެސް އަދިވެސް ގުރްގްރަމްގެ ރައްޔިތުން ތިބީ ބިރުން ކަމަށް އަލްޖަޒީރަގައި ބުނެފައިވެއެވެ. އަލްޖަޒީރާގައި ބުނެފައިވަނީ އަދިވެސް ހައްދުފަހަނައެޅި އަނިޔާވެރި ހިންދޫންގެ ގްރޫޕްތަކުން ގުރުގްރަމްގެ މަގުތަކުގައި ހަރަކާތްތެރިވަމުންދާ ކަމަށެވެ. އަދި އެމީހުން މުސްލިމުން ހިންގާ ކުދި ވިޔަފާރި ތަކުގައި ރޯކޮށް ހުޅުޖަހަމުންދާކަމަށެވެ.