ސަރުކާރުން ކުންފުނިތަކާއި ހަވާލުކުރާ މަޝްރޫޢުތައް ނުނިމުމުން އެހެންމީހުންގެ ބޮލުގައި ޒިންމާ ނޭޅުވުމަށް ކެންދޫ ދާއިރާގެ މަޖިލިސް މެމްބަރު ޢަލީ ހުސެއިން ވިދާޅުވެއްޖެއެވެ.

ޢަލީ ހުސެއިން މިހެން ވިދާޅުވެފައިވަނީ އޭނާ ކުރެއްވެވި ޓުވީޓެއްގައެވެ.

ޢަލީ ހުސެއިން މިފަދައިން ޓުވީޓު ކުރައްވައިފައިވަނީ ރައީސް ޞާލިޙް ށ. އަތޮޅުގެ ބައެއް ރަށްރަށަށް ކުރެއްވި ކެމްޕޭނު ދަތުރުފުޅުގެ ތެރެއިން އެއަތޮޅު މާއުނގޫދުއަށް ކުރެއްވި ދަތުރުފުޅުތެރެއިން، އެރަށު ރައްޔިތުންނާއި ދެއްކެވި ވާހަކަފުޅަކާއި ގުޅިގެނެވެ.

ރައީސް ޞާލިޙް ވިދާޅުވެފައިވަނީ ފެނާއި ނަރުދަމާގެ ޚިދުމަތް ޤާއިމު ކުރުމަށް ސްޓެޓިކް ކުންފުންޏާއި ޙަވާލު ކުރިތާ ހަތަރު އަހަރު ވެގެން ދިޔައިރު ވެސް، އެ މަސައްކަތް ނުނިމޭ ކަމަށެވެ. އަދި ރައީސް ވަނީ އެކަމާއިމެދު ކަންބޮޑުވުން ފާޅުކުރައްވައިފައެވެ.

މިކަމާއި ގުޅިގެން ކުރެއްވެވި ޓްވީޓުގައި ޢަލީ ވިދާޅުވެފައިވަނީ ދައުލަތުގެ ހިއްސާ އޮންނަ ކުންފުނި ތަކާއި ހަވާލުކޮށްފައި ހުރި ފެނާއި ނަރުދަމާގެ މަސައްކަތްވެސް ގިނަ ރަށްރަށުގައި ހުރީ ނުނިމި ކަމަށެވެ.

"ރައްޔިތުން ޒިންމާ ޙަވާލުކުރީ މަނިކުފާނާ، އެހެން ބައެއްގެ ބޮލުގައި ޒިންމަ އަޅުވަން ނޫޅުއްވާ"  ޢަލީ ހުސެއިން ވިދާޅުވެފައިވެއެވެ.

ރައީސް ޞާލިޙްގެ މިވާހަކަފުޅުތަކާއި ގުޅިގެން އިދިކޮޅު ފަރާތްތަކުން ދަނީ އެމަނިކުފާނަށް ވަރަށް ބޮޑަށް ފާޑު ވިދާޅުވަމުންނެވެ.