ހއ ބާރަށު ރައްޔިތުން ތިބީ މިސަރުކާރުން ގެންނަމުންދަ ތަރައްޤީއާއި އެކު ކުރިއަށްދާން ތައްޔާރަށް ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ހއ.އަތޮޅަށް ކުރައްވަމުންދާ ކެމްޕޭނު ދަތުރުފުޅުގައި އެއަތޮޅު ބާރަށަށް ވަޑައިގެން އެރަށު ރައްޔިތުންނާއި އެކު ބޭއްވެވި ޖަލްސާގައެވެ.

ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ މިއަދު އެރަށަށް ފައިބައިގެން އައިރު ފެނިވަޑައިގަތީ 2018ގެ އިންތިޚާބުގެ ތެރޭގައި މަރުޙަބާކީ ރައްޔިތުންނަށްވުރެ ގިނަ ރައްޔިތުން މަރުޙަބާ ކީ މަންޒަރު ކަމަށާއި އެއިން ދައްކުވައިދެނީ ބާރަށު ރައްޔިތުން ތިއްބެވީ މިސަރުކާރުން މިއަދު މިގެންނަމުންދާ ތަރައްޤީއާއި އެކު ކުރިއަށްދާން ތައްޔާރަށް ކަމަށެވެ.

"ބާރަށަކީ މުސްތަޤްބަލު އޮތް ރަށެއް، ހަނިމާދޫ އެއަރޕޯޓު އެއޮތީ މިރަށާ 15 ވަރަކަށް މިނިޓު ކައިރީގައި، ރަށު ފަތުރުވެރިކަން ތަރައްޤީ ކުރުމަށް މިއަށްވުރެ ފައްކާ ރަށެއް އޮންނާނެއެކޭ އަޅުގަނޑު ނުދެކެން، ތިޔަބޭފުޅުން ތައްޔާރުވާންވީ ދުރާލާ، އިރާދަކުރެއްވިއްޔާ ކުރިއަށް އޮތް ދައުރުތެރޭގައި އަޅުގަނޑުމެންގެ ސިޔާސަތުގެ ތެރޭގައި ގެސްޓުހައުސް އެޅުމަށްޓަކައި ވަކިފަންޑެއް ހުޅުވައި އޭގެން ލުއި ލޯނު ލިބޭ ގޮތް ހަދައިދޭނަން" ރައީސް ޞާލިޙް ވިދާޅުވިއެވެ.  

އޭގެ ސަބަބުން ރަށުގައި ތިބެގެން މަސައްކަތްކޮށް އާމްދަނީ ހޯދުމަށް މަގުފަހުވެގެން ދާނެ ކަމަށް އެމަނިކުފާނު ވިދާޅުވިއެވެ.

ރައީސް ޞާލިޙް ކުރައްވަމުން މިގެންދާ ކެމްޕޭނު ދަތުރުފުޅުގައި މިހަފްތާގައި ވަނީ ށ.އަތޮޅުގެ ގިނަ ރަށްތަކަކަށްވެސް ޒިޔާރަތް ކުރައްވައިފައިވެއެވެ. މިދަތުރުތަކުގައި ކޯލިޝަންގެ ބައިވެރިންނާއި ސަރުކާރުގެ އިސް ފަރާތްތަކުން ދަނީ ބައިވެރިވަމުންނެވެ.