އެމިރޭޓްސް ކަޕް 2023 ގެ ފައިނަލްގައި މޮނާކޯ ބަލިކޮށް މުބާރާތުގެ ޗެމްޕިއަންކަން އާސެނަލް އިން ހޯދައިފިއެވެ. 

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ މޮނާކޯ އިންނެވެ. މި ލަނޑު ފުރަތަމަ ހާފުގެ 31 ވަނަ މިނެޓުގައި ކާމިޔާބުކޮށްދިނީ އެޓީމުގެ މިޑްފިލްޑަރު ޔޫސުފް ފޮފާނާ އެވެ. މިއީ އެޓީމުގެ މާލީ މިޑްފީލްޑަރު މުހައްމަދު ކަމާރާ ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

އާސެނަލް އިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 43 ވަނަ މިނެޓުގައި ކާމިޔާބުކޮށްދިނީ އިގިރޭސި ފޯވާޑް އެޑީ އެންކެޓިއާ އެވެ. މިއީ އެޓީމަށް ލިބުނު ކޯނަރެއްގައި ބްރެޒިލް ފޯވާޑް  ގެބްރިއަލް މާޓިނެލީ ގޯލު ކުރިމައްޗަށް ހުރަސްކޮށްދިން ބޯޅައެއް މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި ލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ 90 މިނެޓުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

ނަތީޖާ ނެރުމަށްޓަކައި ޖެހި ޕެނަލްޓީގައި އާސެނަލް އިން ފޮނުވާލި ފަސް ޕެނަލްޓީ ވެސް އެޓީމުން ކާމިޔާބުކުރި އިރު، މޮނާކޯގެ ފަސް ޕެނަލްޓީގެ ތެރެއިިން އެޓީމުގެ ޖަޕާނު ފޯވާޑް މިނަމީނޯ ފޮނުވާލި ޕެނަލްޓީ ނަކާމިޔާބުވެ، އާސެނަލް އަށް ކުރި ލިބުނީ 5-4 ގެ ނަތީޖާއަކުންނެވެ.

އަންނަ ހަފްތާގެ އާދީއްތަ ދުވަހު އައު ސީޒަން ފެށުމުގެ ގޮތުން ކުޅޭ ޗެރިޓީ ޝީލްޑް މެޗުގައި މެންޗެސްޓާ ސިޓީ އާއި ދެކޮޅަށް އާސެނަލް އިން ނިކުންނައިރު، މި މަހުގެ 12 ވަނަ ދުވަހު ޕްރެމިއާ ލީގުގެ އެޓީމު ނުކުންނާނީ ނޮޓިންގހަމް ފޮރެސްޓަށް އާއި ދެކޮޅަށެވެ.