ކުރިއަށް އޮތް ރިޔާސީ އިންތިޚާބުގައި ވޯޓު ފޮށި ބެހެއްޓޭކަން ޔަޤީންވެފައިވަނީ 41 ރިސޯޓެއްގައި ކަމަށް އިލެކްޝަންސް ކޮމިޝަންގެ ނައިބު އިސްމާއިލް ޙަބީބު ވިދާޅުވެއްޖެއެވެ.
ޙަބީބު މިހެން ވިދާޅުވީ އޭނާ އިއްޔެ ކުރެއްވެވި ޓްވީޓެއްގައެވެ.
ޙަބީ ބު ވިދާޅުވެފައިވަނީ ވޯޓުފޮށި ބަހައްޓަން ބޭނުންވެގެން ހުށައެޅި 75 ރިސޯޓުގެ ތެރެއިން އިއްޔެގެ ނިޔަލަށް މީހުން ރެޖިސްޓަރ ކޮށްފައިވަނީ 41 ރިސޯޓަކުން ކަމަށެވެ.
ރިސޯޓެއްގައި ވޯޓު ފޮށި ބަހައްޓާނީ މަދުވެގެން 30 މީހުން ވޯޓުލާން ރަޖިސްޓްރީކޮށްފައިވާ ރިސޯޓުތަކުގައެވެ.
މީގެއިތުރުން ރިޔާސީ އިންތިޚާބުގައި 8 ޤައުމެއްގައި ވޯޓު ފޮށި ބެހެއްޓުމަށް އީސީ އިން ނިންމިއެވެ. ރާއްޖެއިން ބޭރު ޤައުމެއްގައި ވޯޓު ފޮށި ބަހައްޓަނީ އެޤައުމަކުން ވޯޓުލުމަށް 150 މީހުން ރަޖިސްޓަރ ކޮށްފައިވާނަމައެވެ.
އޮންލައިންކޮށް ރަޖިސްޓްރީވުމުގެ ފުރުސަތު ހަމަވެފައިވާއިރު ފޯމު ހުށަހަޅައިގެން ރީރަޖިސްޓްރީ ކުރަން ބޭނުންވާ ފަރާތްތަކަށް އެފުރުސަތު މިމަހުގެ 5 ވަނަ ދުވަހާ ހަމައަށް އޮންނާނެއެވެ.
މިއަހަރު ބާއްވާ ރިޔާސީ އިންތިޚާބުގައި 282،755 މީހުންނަށް ވޯޓުލުމުގެ ޙައްގު ލިބިފައިވާ ކަމަށް އީސީން ބުނެއެވެ. އަދި 600ށް ވުރެ ގިނަ ވޯޓު ފޮށި ބަހައްޓާނެކަމަށް އީސީން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
