ވެރިކަމަށް ވަޑައިގަންނަވާ ބޭފުޅެއްގެ ސިއްޙީ ޙާލަތު ޢާންމު ކުރަންޖެހޭ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ރޭ ތ.ކިނބިދޫގައި ބޭއްވި ކެމްޕޭނު ޖަލްސާގައި ވަހަކަފުޅު ދައްކަވަމުންނެވެ.
"އަޅުގަނޑު ކުރީ ދުވަހަކު ދެންނެވިން، ދިވެހިރާއްޖޭގެ ވެރިކަމަށް ވަޑައިގަންނަވާ ބޭފުޅަކުގެ ސިއްޚީ ޙާލަތު އެއީ ދިވެހި ރައްޔިތުންނަށް އެނގިފައި އޮންނަން ޖެހޭނޭ ކަމެކޭ، އަޅުގަނޑު މިވާހަކަ ދެންނެވީމާ ހިތްބަރުވެސް ކުރޭ އަޅުގަނޑުގެ ގާތްމީހުން، އަޅުގަނޑަށް އިނގޭ އެހެން މާނަ ނެގޭނެކަން، އެހެންނަމަވެސް އެމެރިކާގަ، ޑިމޮކްރެސީއެއްގައި ރައީސުލް ޖުމްހޫރިއްޔާގެ ހެލްތް ސެޓްފިކެޓް ޑޮކްޓަރު ސެޓްފިކެޓް އެއީ ޢާންމު މައުލޫމާތައް ވާންޖެހޭ، ރައީސުލްޖުމްހޫރިއްޔާގެ އެއްވެސް ބައްޔެއް ހުންނަނަމަ އެއީ އާންމުކޮށް އެނގެންޖެހޭ ކަމަކަށްވޭ" ރައީސް ނަޝީދުގެ ވާހަކަފުޅުގައި ވިދާޅުވިއެވެ.
ރައީސް ނަޝީދުގެ މިވާހަކަފުޅުތަކާއި ގުޅިގެން ރޭގެ ޖަލްސާގައި ދަ ޑިމޮކްރެޓްސްގެ ރިޔާސީ ކެނޑިޑޭޓް އަދި ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވީ އޭނާގެ ހެލްތް ސެޓްފިކެޓް އާންމު ކުރައްވާނެ ކަމަށެވެ. އަދި އެއްވެސް ބައްޔެއް މިވަގުތު ނެތް ކަމަށްވެސް އިލްޔާސް ވިދާޅުވިއެވެ.
މީގެ އިތުރުން ސިއްޙީ ޙާލަތު ހުރީ ރަނގަޅަށް ކަމަށާއި ރިޔާސީ ރޭހަށް ނިކުމެ ހުންނެވީ ވަރަށް ޖޯޝާއެކު ކަމަށް ވެސް އިލްޔާސް ވިދާޅުވިއެވެ. އެގޮތުން ހަފްތާއަކު ހަތް ދުވަހު ދުވާލަކު 24 ގަޑިއިރު ނުނިދާ އިންނަވައިގެން ވެސް އެ މަސައްކަތުގައި ދެމި ހުންނަވާނެ ކަމަށް އިލްޔާސް ވިދާޅުވިއެވެ.
މީގެ ކުރިންވެސް ދަ ޑިމޮކްރެޓްސްގެ ޖަލްސާއެއްގައި ވާހަކަ ދައްކަވަމުން ރައީސް ނަޝީދު ވަނީ މިފަދަ ވާހަކަފުޅުތަކެއް ދައްކަވައިފައެވެ.
Advertisement
This content is created and paid for by advertisers and does not involve Voice Journalists
