މޫނުބުރުގާގެ ދިފާޢުގައި ބާއްވާ ދެވަނަ އިޙްތިޖާޖު މާދަމާ ބާއްވަން ނިންމައިފިއެވެ.
މި އިޙްތިޖާޖު އިންތިޒާމު ކުރާ "އައިސްޓޭންޑްވިތްނިޤާބް" ފޭސްބުކް ޕޭޖުގެ ފަރާތުން "ވޮއިސް" އަށް މަޢުލޫމާތު ދެއްވި ފަރާތުން ވިދާޅުވީ މޫނުބުރުގާގެ ދިފާޢުގައި ބާއްވާ އިޙްތިޖާޖުގެ ދެވަނަ އިޙްތިޖާޖު އޮންނާނީ 4 އޮގަސްޓު ވާ ހުކުރު ދުވަހުގެ ހަވީރު 4:30 ގައި ކަމަށެވެ. އިވެންޓް އޮންނާނީ ހެންވޭރު އާޓިފިޝަލް ބީޗުގައި ކަމަށްވެސް އެފަރާތުން ވިދާޅުވެއެވެ.
މާލޭގެ އިތުރުން ރާއްޖޭގެ ބައެއް ރަށްރަށުގައިވެސް މި އިޙްތިޖާޖު ކުރިއަށް ދާނެ ކަމަށް އެފަރާތުން މައުލޫމާތު ދެއްވައެވެ.
މި އިޙްތިޖާޖުގެ ޑިމާންޑަކީ މޫނުބުރުގާ އަޅައިގެން ތަޢުލީމީ ދާއިރާގައި ހަރަކާތްތެރިވުމާއި ތަޢުލީމު ދިނުމަށް ހުރަސް އެޅިދާނެ ގޮތަށް އޮތް މާއްދާ އުވައިލައި ސާފު ނައްޞުން މޫނު ބުރުގާ އަޅައިގެން ތަޢުލީމީ ދާއިރާގައި ހަރަކާތްތެރި ވެވޭނެކަމާއި ތަޢުލީމު ދެވޭނެ ކަން އުސޫލުން ބަޔާން ކުރުން ކަމަށް "އައިސްޓޭންޑްވިތްނިޤާބް"ން ބުނެފައިވެއެވެ.
މީގެ އިތުރުން މި އިޙްތިޖާޖު އިންތިޒާމު ކުރާ ފަރާތުން ބުނެފައިވަނީ މިކަމަށް ތާއީދު ކުރާ ދެޖިންސުގެ މީހުންނަށްވެސް އިޙްތިޖާޖުގައި ބައިވެރިވެވޭނެ ކަމަށެވެ.
އިޙްތިޖާޖު ކުރުމުގެ ތެރޭގައި ދެ ޖިންސު މަސްހުނި ނުވާނެކަމަށާއި، މި އިޙްތިޖާޖަކީ ހަމަހިމޭން އިޙްތިޖާޖެއް ކަމަށް އެފަރާތުން ބުނެފައިވެއެވެ.
މިދިޔަ ހޮނިހިރު ދުވަހުވެސް އެފަރާތުން ވަނީ ކާނިވާ ސަރަހައްދުގައި ހިމޭން އިޙްތިޖާޖެއް ކޮށްފައިވެއެވެ. ހަމަ އެދުވަހު ރާއްޖޭގެ ދެރަށަކުންވެސް މި އިޙްތިޖާޖުގައި ބައިވެރިވެފައިވެއެވެ.
Advertisement
This content is created and paid for by advertisers and does not involve Voice Journalists
