އެމްޑަބްލިއުއެސްސީ ދިވެހި ޕްރެމިއާ ލީގުގައި މިއަދު ހަވީރު ބުރު ސްޕޯޓްސް އާއި ސުޕަރ ޔުނައިޓެޑް ސްޕޯޓްސް ވާދަކުރި މެޗު 2-1 ގެ ނަތީޖާއަކުން ސުޕަރ ޔުނައިޓެޑް ސްޕޯޓްސް އިން ކާމިޔާބުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ސްޕަރ ޔުނައިޓެޑް ސްޕޯޓްސް އިންނެވެ. މި ލަނޑު މެޗު ފެށިގެން ހަވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު ހުސާމް އެވެ. މިއީ އެޓީމުގެ ސަހާއު މުޅިން ހުސްކޮށްލާފައި ޖައްސާލި ބޯޅައެއްގައި މުޅިން ހުސްކޮށް ކުރިއަށް އަރައި ވަރަށް ހަމަޖެހިލާފައި ކީއްޕަރުގެ ބޯމަތިން ގޯލުގެ ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ސުޕަރ ޔުނައިޓެޑް ސްޕޯޓްސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މި މެޗުގައި ސްޕަރ ޔުނައިޓެޑް ސްޕޯޓްސް އިން ކާމިޔާބުކުރި ދެވަނަ ލަނޑު ދެވަނަ ހާފު ފެށިގެން ފަސްވަނަ މިނެޓްގައި ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން އަހުމަދު ހުސާމް އެވެ.

މިއީ ބުރުގެ ޕެނަލްޓީ އޭރިއާ ބޭރުން ލިބުނު ބޯޅައެއްގައި ކައިރީގައި ހުރި ކުޅުންތެރިއާ ކައިރިން ނައްޓާލުމަށް ފަހު ބޯޅައާއެކު ޕެނަލްޓީ ތެރެއަށް ވަދެ ތިރިތިރިން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ނަމަވެސް އޭގެ ހަ މިނެޓް ފަހުން ބުރުން ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ  އަހުމަދު ރަޝީދު އެވެ. މިއީ އެޓީމުގެ ސުލައިމާނު އަރިމަތިން ހުރަސްކޮށްދިން ބޯޅައެއް ސްޕަރ ޔުނައިޓެޑް ސްޕޯޓްސްގެ ގޯލު އޭރިޔާ ތެރޭގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ސްޕަރ ޔުނައިޓެޑް ސްޕޯޓްސް ކުރީގައި އޮވެގެންނެވެ. މި މެޗުގެ މޭން އޮފް ދަ މެޗަކަށް ހޮވުނީ ސްޕަރ ޔުނައިޓެޑް ސްޕޯޓްސް އަހުމަދު ހުސާމް އެވެ. 

މި މެޗުން ލިބުނު ތިން ޕޮއިންޓާއެކު ކުޅުނު 7 މެޗުން 15 ޕޮއިންޓް ހަމަކޮށް ސްޕަރ ޔުނައިޓެޑް ސްޕޯޓްސް މިވަގުތު އޮތީ ލީގު ތާވަލްގެ އެއްވަނައިގައެވެ. އަދި މި މެޗުން ބަލިވި ބުރު ސްޕޯޓްސް ކުލުނު 7 މެޗުން ލިބުނު 12 ޕޮއިންޓާއެކު މިވަގުތު އޮތީ ލީގު ތާވަލްގެ ހަތަރުވަނައިގައެވެ.