އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް އެޗްގައި ކޮލަމްބިއާ އަތުން މޮޅުވެ ގުރޫޕްގެ ދެވަނަ ޓީމުގެ ގޮތުގައި މޮރޮކޯ އިން މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފިއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. އަދި ފުރަތަަމަ ހާފުގެ އިތުރު ވަގުތުގެ ތެރޭގައި ކޮލަމްބިއާގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއަކު ކުރި ފައުލަކާއި ގުޅިގެން ރެފްރީ ވަނީ މޮރޮކޯ އަށް ޕެނަލްޓީއެއް ދީފައެވެ.

މޮރޮކޯގެ ތަޖުރިބާކާރު މިޑްފިލްޑަރު ގިޒްލޭން ޗެބްބަކް ފޮނުވަލި ޕެނަލްޓީ ކޮލަމްބިއާގެ ކީއްޕަރު ދިފާއުކުރި ނަމަވެސް އެބޯޅަ ލިބުނީ މުޅިން ހުސްކޮށް ހުރި މޮރޮކޯގެ ފޯވާޑް އަނީސާ ލަހްމާރީ އަށެވެ. އޭނާ ވަނި ވަރަށް ހަމަޖެހިލާފައި ގޯލުގެ ތެރެއަށް ބޯޅަ ފޮނުވާލައިގެން މި މެޗުގައި މޮރޮކޯއަށް ލީޑު ހޯދައިދީފައެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން މޮރޮކޯ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިހާފުގައި ލަނޑުޖަހާނެ އެންމެ ހުސް ފުރުސަތެއް ލިބުނީ ކޮލަމްބިއާ އަށެވެ. ދެވަނަ ހަފުގެ 78 ވަނަ މިނެޓުގައި އެޓީމުގެ ފޯވާޑް މެއިރާ ތަޓައިނާ ރަމިރޭޒް ފިނުވާލި ބާރު ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން މޮރޮކޯ ކުރީގައި އޮވެގެންނެވެ. މިއީ ވޯލްޑް ކަޕް ފުޓްބޯޅަ މުބާރާތުގައި މުޅިން އަލަށް ވާދަކުރަމުން އަންނަ މޮރޮކޯ އިން ހޯދި ތާރީޚީ ކާމިޔާބެކެވެ.

މި މެޗުން ލިބުނު ތިން ޕޮއިންޓާއެކު ގްރޫޕް އެޗްގެ ދެވަނަ ޓީމުގެ ގޮތުގައި މޮރޮކޯ އިން ވަނީ މުބާރަތުގެ ދެވަބުރުން ޖާގައެއް ކަށަވަރުކޮށްފައެވެ. އަދި މި މެޗުން ބަލިވި ނަމަވެސް ގުރޫޕްގެ އެއްވަނަ ޓީމުގެ ގޮތުގައި ކޮލަމްބިއާ އަށް ވެސް ވަނީ ދެވަނަ ބުރުން ފުރުސަތު ލިބިފައެވެ.

މުބާރާތުގެ ދެވަނަ ބުރުގައި މޮރޮކޯ ވާދަކުރަންޖެހެނީ ފްރާންސް އާއި ދެކޮޅަށެވެ. މިއީ 2008 ވަނަ އަހަރުގެ ފަހުން މިދެޓީމުގެ މެދުގައި ކުޅެވޭ ފުރަތަަމަ މެޗެވެ. އެކުވެރިކަމުގެ މެޗެއްގައި 2008 ވަނަ އަހަރު މިދެޓީމު ވާދަކުރި މެޗު 6-0 ގެ ނަތީޖާއަކުން މޮޅުވީ ފުރާންސް އެވެ.