ފުރެދުމަކަށް ގޮވާލި މީހާއަށް، އޭނާއާ ތަބާވި މީހުން ކުރި ނުބައި އަމަލު ތަކުގެ ފާފަތައް ލިބޭނެ ކަމަށް އަހަރެމެންގެ ލޮބުވެތި ރަސޫލާ ޞައްލައްالله ޢަލައިހި ވަސައްލަމް ހަދީޘް ކުރައްވާފައިވާ ކަމަށް މިއަދުގެ ޚުތުބާގައި ބުނެފިއެވެ. 

ހެޔޮކަމުގެ ތަޅުދަނޑި މައުލޫއަށް މިއަދު އިއްވި ޚުތުބާގައި ބުނީ، ހެޔޮކަމުގެ އެންމެ މުހިއްމު ތަޅުދަނޑި އަކީ، ފައިދާ ހުރި ޢިލްމުތައް އުނގަންނައި ދިނުމާއި، ތަފާތު ވަސީލަތް ތަކުން ޢިލްމު ފެތުރުން ކަމަށެވެ. އަދި ހުރިހާ ހެޔޮ ކަމެއްގެ އަސާސަކީ ޝަރުއީ ގިއުގަނޑުގެ ތެރޭގައި ދެވޭ ރަނގަޅު ތަޢުލީމު ކަން ފާހަގަ ކޮށް ޚުތުބާގައި ބުނީ، ޒަމާނީ ކުރުމުގެ ނަމުގައި ވިޔަސް ތަޢުލީމް އެ ގިއުގަނޑުން ބޭރު ވެގެން ނުވާނެ ކަމަށެވެ.

މިއާއެކު ޚުތުބާގައި ބުނީ، މިއަދު އަހަރެމެންގެ ތެރެއަށް ފެތުރެމުންދާ ނުބައި އާދަތަކާއި، ބަދު އަޚްލާޤީ އަމަލު ތަކާއި، އިސްލާމް ދީނާއި ޚިލާފު ފިކުރު ތަކުގެ ސަބަބަކީ ނުބައި ކަންތައް ތަކުގެ ތަޅުދަނޑިތައް ގިނަވުން ކަމަށެވެ. އަދި ހެޔޮ ކަމުގެ ތަޅުދަނޑި ތައް މަދު ވުން ކަމަށެވެ. 

Advertisement

"ރަސޫލާ ޞައްލައްالله ޢަލައިހި ވަސައްލަމް ހަދީޘް ކުރެއްވި އެވެ. "ފުރެދުމަކަށް ގޮވާލި މީހާއަށް، އޭނާއާ ތަބާވި މީހުން ކުރި ނުބައި އަމަލު ތަކުގެ ފާފަތައް ލިބޭނެއެވެ. އެއީ އެބަމީހުން ކުރި ނުބައި ކަމުގެ ފާފައިން އެއްވެސް އެއްޗެއް އުނިވުމެއް ނެތިއެވެ." ޚުތުބާގައި ބުނެފައިވެއެވެ. 

ޚުތުބާގައި އިތުރަށް ބުނީ، ނުބައި ކަންތައްތައް އީޖާދު ކުރާ މީހުންނާއި، ނުބައި ކަންތައްތައް ރަނގަޅު ކަންކަމަށް ހަދައިގެން މީހުންނަށް ތައާރުފު ކޮށްދޭ މީހުންނަށް، އެމީހުންގެ ފާފަތަކުގެ އިތުރުން، އެމީހުންނަށް ތަބައުވީ ހުރިހާ އެންމެން ކުރާ ނުބައި އަމަލުތަކުގެ ފާފަތައް އުފުލަން ޖެހޭނެ ކަމަށެވެ.

ވުމާއެކު މުސްލިމުން ނަމޫނާއަކަށް ވާން ޖެހޭނީ ހެޔޮ ކަންކަމުގައި ކަމަށާ އަހަރެމެންގެ އާދަކާދަތަކާއި، ބުނާ ބަސްތަކާއި، ސުލޫކާއި، އަމަލު، އިސްލާމް ދީނުގެ އުސޫލުތަކާ އެއްގޮތަށް ބައްޓަން ކުރަން ޖެހޭނެ ކަމަށްވެސް ޚުތުބާގައި ނަސޭހަތްތެރުވެފައިވެއެވެ.