އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ގެ ކެންޑިޑެސީ އާއި ގުޅޭ މައްސަލައިގެ އަޑުއެހުމުގެ ވަގުތު ޖެހިފައި ވަނިކޮށް ސްޕްރީމްކޯޓް ސަރަހައްދުން ކަރަންޓް ކެނޑުމުން، މައްސަލަ ބާއްވާ ގަޑި ފަސްކޮށްފިއެވެ.

ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ ކެނޑިޑެސީ އިލެކްޝަންސް ކޮމިޝަނުން ބަލައިނުގަތް މައްސަލަ ސުޕްރިމް ކޯޓުގައި އިސްތިއުނާފުކޮށްފައި ވާއިރު، އެ މައްސަލައިގެ އަޑުއެހުން ތާވަލުކޮށްފައި އޮތީ މިއަދު 3:00 އަށް ކަމަށް ސްޕްރީމް ކޯޓުން ބުނެފައި ވެއެވެ. 

އެހެންނަމަވެސް ޝަރީޢަތުގެ މަޖިލިސް ދެން ފެށޭނީ 15:45 ގައި ކަމަށާ، ޝަރީޢަތް ފެށުން ލަސްވެފައިވަނީ ސުޕްރީމް ކޯޓު ހިމެނޭ ސަރަހައްދުން ކަރަންޓު ދިއުމުގެ ސަބަބުން ކަމަށް އެ ކޯޓުން ބުނެފައި ވެއެވެ. 

ކަރަންޓް ކެނޑުމާއި ގުޅިގެން 'ވޮއިސް' އަށް މައުލޫމާތު ދެއްވަމުން ސްޓެލްކޯގެ މީޑިއާ އޮފިޝަލް ވިދާޅުވީ، ސްޕްރީމްކޯޓް ހިމެނޭ ސަރަހައްދުގައި އެންމެ ފުރަތަަމަ ކަރަންޓް ދިޔައީ ސްބްސްޓޭޝަންއެއްގެ ސްވިޗެއްގައި މައްސަލަ ޖެހިގެން ކަމަށެވެ. އެކަން ހައްލުކޮށް ކަރަންޓް ދީފައި ވަނިކޮށް އަނެއްކާ ކަރަންޓް ދިޔައީ، އޯވާ ލޯޑް ވެގެން ކަމަށެވެ. 

މައްސަލައިގެ އަޑުއެހުމަށް ވަނުމަށް އިދިކޮޅުު ލީޑަރޝިޕް ގެ ގިނަ ބޭފުޅުން ސްޕްރީމްކޯޓް ސަރަހައްދަށް އެއްވެފައި ވާއިރު،  ރައީސް ޔާމީންވެސް ވަނީ ސްޕްރީމް ކޯޓަށް ހާޒިރު ކޮށްފައެވެ. އަދި އެ ސަރަހައްދުގައި މިވަގުތު ފުލުހުންވެސް އަންނަނީ ހަރަކާތްތެރިވަމުންނެވެ. 

ރައީސް ޔާމިނުގެ ކެނޑިޑެސީ ފޯމު ޕީޕީއެމުން އިލެކްޝަންސް ކޮމިޝަނަށް ހުށައެޅީ އޮގަސްޓު 1 ގަ އެވެ. ހަމަ އެދުވަހު އީސީން ވަނީ ރައީސް ޔާމިނުގެ ކެނޑިޑެސީ ފޯމު ބަލައިނުގަތުމަށް ނިންމާފަ އެވެ. ސަބަބެއްކަމަށް އީސީން ބުނެފައިވަނީ އެމަނިކުފާނަކީ މިވަގުތު ޖަލު ހުކުމެއް ތަންފީޒު ކުރައްވަމުން ގެންދަވާ ފަރާތަކަށް ވުމެވެ. 

އެފަހުން ރައީސް ޔާމިނުގެ ފަރާތްޕުޅުން ވަނީ އީސީގެ ނިންމުން ސުޕްރިމް ކޯޓުގައި އިސްތިއުނާފުކޮށްފަ އެވެ. އަދި އެ ކޯޓުން ވަނީ އެ މައްސަލަ ބަލައިގަނެ އިލެކްޝަންސް ކޮމިޝަނުން ޖަވާބުދާރީވުމަށް އަންގާފަ އެވެ. 

އެ މައްސަލައާއި ގުޅިގެން އިއްޔެ ސުޕްރިމް ކޯޓަށް ޖަވާބު ފޮނުވާނެކަމަށް އީސީން ވަނީ ބުނެފައެވެ. 

ރައީސް ޔާމީންގެ ފަރާތްޕުޅުން ސުޕްރީމްކޯޓަށް ހުށަހަޅުއްވާފައިވާ މި މައްސަލައަށް ސުޕްރީމް ކޯޓުން ދައުލަތް ތަދައްހުލު ކުރުވާފައިވާތީ، އެ މައްސަލައިގައި ބަންޑާރަނައިބުގެ ފަރާތުން ކޯޓަށް ހާޒިރުވުމަށް ނިންމާފައިވާއިރު، އެމަނުކުފާނަށް ތާއީދު ކުރައްވާ އެންމެހާ ރައްޔިތުންގެ ޙައްޤުތައް ހިމާޔަތްކޮށްދިނުމަށް ކަމަށް ބުނެ ޕީޕީއެމުންވެސް ވަނީ މައްސަލައިގެ ތެރެއަށް ތަދައްޚުލުވެފައެވެ.

މިއަދުގެ އަޑުއެހުމަށްފަހު ދެން އޮންނާނީ މައްސަލައިގައި ގޮތް ނިންމުމެވެ.