އެމްޑަބްލިއުއެސްސީ ދިވެހި ޕްރެމިއާ ލީގުގައި މިއަދު ހަވީރު ކުލަބު ވެލެންސިއާ އާއި ގްރީން ސްޓްރީޓް ވާދަކުރި މެޗުގެ ފަހުވަގުތު ކާމިޔާބުކުރި ލަނޑާއެކު ވެލެންސިއާ އިން ލީގުގައި ފުރަތަމަ ޕޮއިންޓް ހޯދައިފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ގްރީން ސްޓްރީޓް އިންނެވެ. މިލަނޑު ފުރަތަމަ ހާފުގެ 14 ވަނަ މިނެޓުގައި ކާމިޔާބުކޮށްދިނީ އިބްރާހިމް ހަސީބު އެވެ.

މިއީ ވެލެންސިއާގެ ހާފުގެ މެދެންހާ ހިސާބުން ގްރީން ސްޓްރީޓަށް ލިބުނު ހިލޭ ޖެހުމެއްގައި ފޮނުވާލި ބޯޅަ ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ހިތްގައިމު ލަނޑެކެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ގްރީން ސްޓްރީޓް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ވެލެންސިއާ އިން ނަތީޖާ އެއްވަރުކުރި ލަނޑު މެޗު ނިމެން ތިން މިނިޓަށްވެފައި ވަނިކޮށް ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ޔޫސުފް އަޔާން އާމިރު އެވެ.

މިއީ ގްރީން ސްޓްރީޓްގެ ޕެނަލްޓީ އޭރިއާ ތެެރެއިން ޔާމިން ފަހަތަށް ޖައްސާލި ބޯޅައެއް ޕެނަލްޓީ އޭރިއާގެ މެދެންހާ ހިސާބުހުރެ ތިރިތިރިން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. މި މެޗުގެ މޭން އޮފް ދަ މެޗަކަށް ހޮވުނީ ވެލެންސިއާގެ އަހުމަދު ސިޒާންއެވެ.

މިއީ މިސީޒަނުގައި މިހާތަނަށް ކުޅުނު ހަމެޗުން ވެލެންސިއާ ހޯދި ފުރަތަަމަ ޕޮއިންޓެވެ. އަދި މި މެޗުން ލިބުނު އެއް ޕޮއިންޓާއެކު ގްރީން ސްޓްރީޓަށް ވަނީ އެޓީމު ކުޅުނު 7 މެޗުން ހަތަރު ޕޮއިންޓް ލިބިފައެވެ.