މިއަހަރުގެ ސެޕްޓެމްބަރު މަހުގެ 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ރީ-ރަޖިސްޓަރ ކުރުމަށް ހުޅުވާލި އެންމެ ފަހުގެ ފުރުސަތު މިއަދަށް ހަމަވާތީ ވީހާވެސް ގިނަ ބަޔަކު ރީ-ރެޖިސްޓަރ ކުރުމަށް އިލެކްޝަންސް ކޮމިޝަނުން އެދިއްޖެއެވެ. 

ރަށްވެހިވެފައި ނޫން އެހެން ތަނެއްގައި ވޯޓު ލުމަށް ރީރެޖިސްޓްރީ ކުރުމަށް އިލެކްޝަންސް ކޮމިޝަނުން ހުޅުވާލި ފުރުސަތު މިއަދު ހަވީރު 16:00 ގައި ހަމަވާއިރު، އޮންލައިންކޮށް ރީ-ރަޖިސްޓްރީވުމުގެ ފުރުސަތު މިދިޔަ ބުދަ ދުވަހު ވަނީ ހަމަވެފައެވެ.

އެހެންކަމުން މިވަގުތު ރީ-ރަޖިސްޓަރ ވުމަށް ހުޅުވާލެވިފައިވަނީ އެކަމަށް އެދޭ ފޯމު ފުރިހަމަ ކުރުމަށްފަހު އިލެކްޝަންސް ކޮމިޝަންއަށް ނުވަތަ އެ ކޮމިޝަންގެ ފޯކަލް ޕޮއިންޓްއަކަށް ހުށަހަޅައިގެން އެކަންޏެވެ. 

ރިޔާސީ އިންތިހާބަށް ރީ-ރަޖިސްޓަރީ ވާން ހުޅުވާލިޔަސް، މާލޭގައި ވޯޓުލުމަށް މީގެ ކުރިން ރަޖިސްޓަރީ ވެފައިވާ މީހުން އަލުން ރަޖިސްޓަރީ ކުރަން ނުޖެހޭނެ ކަމަށާއި އެހެންނަމަވެސް މާލެ ފިޔަވައި، ރަށްވެފައިވާ ރަށް ނޫން އެހެން ރަށެއްގައި ދިރިއުޅޭ ހުރިހާ މީހުން އަލުން ރަޖިސްޓަރީ ކުރަން ޖެހޭނެ ކަމުގައި އިލެކްޝަންސް ކޮމިޝަނުން ބުނެފައިވެއެވެ.