ޕާކިސްޠާނުގެ ކުރީގެ ބޮޑުވަޒީރު ޢިމްރާން ޚާން އަށް ތިން އަހަރުގެ ޖަލު ޙުކުމެއް އިއްވައިފިއެވެ.

ޢިމްރާން އަށް އިއްވި މިޙުކުމަކީ ޤާނޫނުތަކާއި ޚިލާފަށް ދައުލަތުގެ ހަދިޔާ ވިއްކާފައިވާތީ އިއްވި ޙުކުމެއް ކަމަށް އެޤައުމުގެ މީޑިޔާތަކުން ބުނެއެވެ.

ޢުމުރުފުޅުން 70 އަހަރުގެ ޢިމްރާންގެ މައްޗަށް ކޮށްފައިވާ ދަޢުވާއަކީ 2018 އިން 2022 އަށް ދައުލަތުގެ އިސްމަޤާމެއްގައި ހުރެ ބާރާއި މަޤާމުގެ ނުފޫޒު ބޭނުންކުރައްވައިގެން، އޭރު ދައުލަތައް ލިބުނު ހަދިޔާތައް 140 މިލިއަން ޕާކިސްތާން ރުޕީސްއަށް ވިއްކާލިކަމުގެ ދައުވާއެވެ.

Advertisement

ޢިމްރާން ޚާންގެ މައްޗަށް 3 އަހަރު ދުވަހުގެ ޖަލު ޙުކުމެއް އިއްވައިފައިވަނީ އޭނާގެ ޣައިރު ހާޒިރުގައެވެ. ރޮއިޓާސް އަށް މަޢުލޫމާތު ދެމުން  ޢިމްރާންގެ ވަކީލު ވިދާޅުވެފައިވަނީ ޢިމްރާން ލާހޯރުގައި ހުންނަވަނިކޮށް މިހާރު ހައްޔަރު ކޮށްފައިވާކަމަށެވެ.

ޢިމްރާން ޚާން ބޮޑުވަޒީރުކަމުން ބޭރުކުރެވުނު ފަހުން އޭނާޔާއި ދެކޮޅަށް 150އެއްހާ މައްސަލަ އެކިފަހަރު މަތިން ކޯޓުތަކަށް ހުށައެޅިފައިވާއިރު، ކޮންމެ މައްސަލައަކާއި މެދުވެސް ޢިމްރާން ވިދާޅުވެފައިވަނީ އެއީ ސިޔާސީ މަޤްސަދެއްގައި ކޮށްފައިވާ ކަމެއް ކަމަށެވެ.

ޤާނޫނީ ފަރާތްތަކުން ބުނެފައިވަނީ މި ޙުކުމްގެ ސަބަބުން މިއަހަރު ނޮވެމްބަރުގައި ބޭއްވުމަށް ހަމަޖެހިފައިވާ އިންތިޚާބުގައި ޢިމްރާންއަށް ވާދަކުރެވުމަށް އޮތް ދޮރު ބަންދުވެފައިވާ ކަމަށެވެ.

ޢިމްރާންގެ ޕާޓީ ޕާކިސްތާން ތަހްރީކޭ އެއިންސާފުން މިހާރު ވަނީ މިމައްސަލަ އިސްތިއުނާފު ކުރުމަށް އެޤައުމުގެ ސްޕްރީމް ކޯޓަށް ހުށައަޅައިފައެވެ.