އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ދެވަަނަ ބުރުގެ ފުރަތަމަ މެޗުގައި ފަސޭހަކަމާއި އެކު ސްވިޒަލޭންޑް ބަލިކޮށް މުބާރާތުގެ ކުއާޓާ ފައިނަލުގެ ފުރަތަމަ ޖާގަ ސްޕެއިނުން ހޯދައިފި އެވެ.

އޮކްލޭންޑްގެ އިޑެން ޕާކްގައި 42،000 ސަޕޯޓަރުންގެ ކުރިމަތީގައި ކުޅެވުނު މި މެޗުގައި ސްޕެއިންގެ ފަރާތުން ތަފާތު މޮޅު ކުޅުމެއް ފެނިގެންދިޔަ، މެޗުގެ ވަރަށް ކުރީކޮޅު އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މި ލަނޑު މެޗު ފެށިގެން ފަސްވަނަ މިނެޓްގައި ކާމިޔާބުކޮށްދިނީ އެޓީމުގެ އިޓާނާ ބޮންމަޓީ އެވެ. 

ނަމަވެސް އޭގެ ހަމިނެޓް ފަހުން އެޓީމުގެ ޑިފެންޑަރު ލެޔާ ކޯޑިނާ އަތުން ބައިކޮޅަށް ވަން ލަނޑާއެކު ސްވިޒަލޭންޑް އިން މެޗު ނަތީޖާ އެއްވަރުކުރި އެވެ.

މި މެޗުގައި ސްޕެއިން އިން ދެވަނަ ފަހަރަށް ލީޑު ހޯދީ ފުރަތަމަ ހާފުގެ 17 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އަލްބާ މާރިއާ އެވެ. އަދި އެޓީމުގެ ތިންވަނަ ލަނޑު 36 ވަނަ މިނެޓުގައި ބޮންމަޓީ ކާމިޔާބުކޮށްދިންއިރު، ފުރަތަމަ ހާފުގެ އެންމެ ފަހު މިނެޓްގައި އެޓީމުގެ ހަތަރުވަނަ ލަނޑު ކާމިޔާބުކޮށްދިނީ ކޯޑިނާ އެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 4-1 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މެޗުގެ ދެވަަނަ ހާފުގައި ސްވިޒަލޭންޑުން އެޓީމުގެ ކުޅުން ރަނގަޅުކޮށް ސްޕެނުގެ ހަމަލާތައް ދިފާއުކުރުމުގައި ރަގަޅު ޑިފެންސިވް ކުޅުމެއް ދެއްކި އިރު، މި މެޗުގައި ސްޕެއިން އިން ކާމިޔާބުކުރި ފަސްވަނަ ލަނޑު ދެވަނަ ހާފުގެ 70 ވަނަ މިނެޓުގައި ކާމިޔާބުކޮށްދިނީ ފޯވާޑް ޖެނިފާ ހަރުމޯސޯ އެވެ.

މިލަނޑާއެކު މެޗުގެ ކުޅުން ނިމިގެންދިޔައީ 5-1 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މުބާރާތުގެ ކުއާޓާ ފައިނަލުގައި ސްޕެއިން ވާދަކުރަންޖެހެނީ ދެވަނަ ބުރުގައި ނެދަލޭންޑްސް އާއި ސައުތު އެފްރިކާ ވާދަކުރާ މެޗުން މޮޅުވާ ޓީމަކާއި ދެކޮޅަށެވެ.