އެމްއެންޕީގެ ރިޔާސީ ކެންޑިޑޭޓް މުޙައްމަދު ނާޒިމްގެ ރަނިންގމޭޓަކަށް އައްޑޫ ސިޓީއަށް ނިސްބަތްވާ ބޭފުޅެއްކަމަށްވާ ޑރ އަޙްމަދު ޢަދީލް ނަސީރު ހަމަޖައްސައިފިއެވެ.
ޑރ ޢަދީލްއަކީ މެނޭޖްމަންޓުގެ ދާއިރާއިން ޕީއެޗްޑީ ހާސިލްކުރައްވައިގެން ހުންނެވި ބޭފުޅެވެ.
އައްޑޫ ސިޓީ ޝަރަފުއްދީން ސްކޫލްގެ ޕްރިންސިޕަލްކަން ވެސް ކުރައްވާފައިވާ ޢަދީލް ވަނީ އެންމެ ފަހުން ބޭއްވުނު ރައްޔިތުންގެ މަޖިލީހުގެ އިންތިޚާބުގައި ހިތަދޫ ދެކުނު ދާއިރާއަށް ވާދަކުރައްވައިފައެވެ.
ރިޔާސީ އިންތިޚާބަށް ނަން ހުށައަޅަން ހަމަޖެހިފައި އޮތް ތާރީޚު ގާތްވަމުންދާއިރު ރިޔާސީ ކެންޑިޑޭޓުން ދަނީ އެކެންޑިޑޭޓުންގެ ރަނިންގމޭޓުން އިޢުލާނު ކުރަމުންނެވެ. އެގޮތުން ޕީއެންސީގެ ރިޔާސީ ކެންޑިޑޭޓް ޑރ މުޢިއްޒު ވަނީ ފަރެސްމާތޮޑާ ދާއިރާގެ މެމްބަރު ހުސެއިން މުޙައްމަދު ރަނިންގމޭޓަކަށް ހަމަޖައްސަވައިފައެވެ.
އެމްޑީޕީ ކޯލިޝަންގެ ރިޔާސީ ކެންޑިޑޭޓު ރައީސް ޞާލިޙްގެ ރަނިންގމޭޓެއްގެ ގޮތުގައި ހިތަދޫ އުތުރު ދާއިރާގެ މެމްބަރު އަދި އެމްޑީޕީ ޕާލިމެންޓްރީ ގްރޫޕްގެ ލީޑަރ މުޙައްމަދު އަސްލަމްއެވެ.
ޖުމްހޫރީ ޕާޓީ އަދި ޑިމޮކްރެޓްސް އިން އަދި ރަނިންގމޭޓަކު ނެރެފައެއް ނުވެއެވެ.
Advertisement
This content is created and paid for by advertisers and does not involve Voice Journalists
