ރައީސް ޔާމިންގެ ކެންޑިޑެސީގެ މައްސަލަގެ ޙުކުމް އިއްވުން މާދަމާ ރައީސް ޢަބްދުﷲ ޔާމިން ޢަބްދުލް ޤައްޔޫމްގެ ކެންޑިޑެސީ މައްސަލައިގެ ޙުކުމް އިއްވުން މާދަމާއަށް ތާވަލުކޮށްފިއެވެ.
އެ މައްސަލައިގެ އަޑުއެހުންތައް އިއްޔެ މެންދުރު ފަހުން ފެށިގެން ރޭ ވަރަށް ދަންވުމާއި ހަމައަށް ވަނީ ކުރިއަށް ގެންގޮސްފަ އެވެ. މައްސަލައިގެ ޙުކުމާ ހަމައަށް ގޮސްފައިވާއިރު، ޙުކުމް ކުރުމުގެ މަޖިލިސް މާދަމާގެ ވަގުތެއްގައި ބޭއްވުމަށް ކޯޓުން ވަނީ ނިންމައިފައެވެ. ނަމަވެސް ތާވަލުކުރާނެ ސީދާ ވަގުތެއް އަދި ނޭނގެ އެވެ.
އެ މަައްސަލައަށް ސުޕްރީމް ކޯޓުން ވަނީ ބަންޑާރަ ނައިބުގެ އޮފީސް ތަދައްޚުލުކޮށްފަ އެވެ. އަދި ޕީޕީއެމްއިން މައްސަލައަށް ތަދައްޚުލުވާން އެދުމުން އެ ފުރުސަތު ޕާޓީއަށް ވަނީ ދީފަ އެވެ.
ރައީސް ޔާމީންގެ ކެންޑިޑެސީގެ މައްސަލަ އެމަނިކުފާނުގެ ފަރާތްޕުޅުން ސްޕްރީމް ކޯޓަށް ހުށައެޅީ އިންތިޚާބުގައި ވާދަކުރުމަށް އެމަނިކުފާނު ޝަރުތު ހަމަނުވާކަމަށް އީސީއިން ނިންމައި އެމަނިކުފަނުގެ ކެންޑިޑެސީ ފޯމު އެކޮމިޝަނުން ބަލައިނުގަތުމުންނެވެ.
ރައީސް ޔާމީނަށް ވާދަނުކުރެވޭ ހާލަތަކަށް ތައްޔާރުވުމަށް ޕީޕީއެމް ޕީއެންސީ ކޯލޮޝަނުން އަންނަނީ މަސައްކަތް ކުރަމުންނެވެ.
Advertisement
This content is created and paid for by advertisers and does not involve Voice Journalists
