އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ދެވަނަ ބުރުގައި މެޗުގައި މިއަދު ހެނދުނު ނެދަލޭންޑްސް އާއި ސައުތު އެފްރިކާ ވާދަކުރި މެޗު 2-0 ގެ ނަތީޖާއަކުން ނެދަލޭންޑްސް ކާމިޔާބުކޮށްފިއެވެ.

މުބާރާތުގެ ދެވަނަ ބުރުން ސައުތު އެފްރިކާ ޖާގަ ހޯދީ ގްރޫޕް ޖީގެ ދެވަނަ ޓީމުގެ ގޮތުގައި ވަރުގަދަ އިޓަލީ އަދި އާޖެންޓީނާ ފަހަތަށް ޖައްސާލުމަށްފަހު އެވެ. އަދި ނެދަލޭންޑްސްގެ ދެވަނަ ބުރުން ޖާގަ ހޯދީ ގުރޫޕް އީގެ އެއްވަނަ ޓީމުގެ ގޮތުގައި އެންމެ ފަހުގެ ޗެމްޕިއަން އެމެރިކާ އާއި ޕޯޗުގަލް ފަހަތަށް ޖައްސާލުމަށް ފަހު އެވެ.

މި މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރީ ނެދަލޭންޑްސް އިންނެވެ. އަދި މެޗުގެ ވަރަށް ކުރީކޮޅު އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މި ލަނޑު ފުރަތަމަ ހާފުގެ 9ވަނަ މިނެޓުގައި ކާމިޔާބުކޮށްދިނީ އެޓީމުގެ މިޑްފިލްޑަރު ޖިލް ރޫޑް އެވެ. 

Advertisement

ނެދަލޭންޑްސްގެ ލަނޑަށްފަހު ދެޓީމުން ވެސް ވަނީ މި ހާފުގައި ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ނެދަލޭންޑްސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ނެދަލޭންޑްސް އިން މެޗު ޑޮމިނޭޓުކުރި އިރު، 54 ވަނަ މިނެޓުގައި އެޓީމުގެ ލީކް މާޓެންސް ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މި މެޗުގައި ނެދަލޭންޑްސް އިން ކާމިޔާބުކުރި ދެވަނަ ލަނޑު ފަހުހާފުގެ 68 ވަނަ މިނެޓުގައި ކާމިޔާބުކޮށްދިނީ ޔުވެންޓަސްގެ މިޑްފީލްޑަރު ލިނެތު ބީރެންސްޓައިން އެވެ. މިއީ އެޓީމުގެ ލީކް މާޓެންސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ނެދަލޭންޑްސް ކުރީގައި އޮވެގެންނެވެ. 

މުބާރާތުގެ ކުއާޓާ ފައިނަލުގައި ނެދަލޭންޑްސް ވާދަކުރަންޖެހެނީ ސްޕެއިން އާއި ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މިމަހުގެ 11 ވަނަ ދުވަހު ރާއްޖެ ގަޑިން ހެނދުނު 06:00 ގައެވެ.