މިއަހަރުގެ ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރައްވާ އެ ޕާޓީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ކެންޑިޑެސީ ފޯމް ހުށަހަޅައިފިއެވެ. 

ދަރުބާރުގޭގައި ހުންނަ އިންތިހާބީ މައި މަރުކަޒަށް މިއަދު ރައީސް ޞާލިޙުގެ ކެންޑިޑެސީ ފޯމު ހުށަހަޅުއްވާފައިވާއިރު، އިލެކްޝަންސް ކޮމިޝަންގެ ރައީސް ފުއާދު ތައުފީގު އަށް ފޯމު ހަވާލުކުރެއްވީ، ރައީސް ޞާލިހު ގެ ކެންޕޭން އޭޖެންޓް، ކިނބިދޫ ދާއިރާގެ މަޖިލިސް މެންބަރު މުހައްމަދު ނާޝިޒު އެވެ. 

ރައީސް ޞާލިހު ގެ އިތުރުން އެމްއެންޕީގެ ރީޔާސީ ކެންޑިޑޭޓް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމްގެ ކެންޑިޑެސީ ފޯމް ވެސް މިއަދު ހުށަހަޅުއްވާނެއެވެ. ނާޒިމްގެ ރަނިން މޭޓަކަށް ކަނޑައަޅުއްވާފައިވަނީ ޑރ. އަހުމަދު އަދީލް ނަސީރު އެވެ.

ރައީސް ޞާލިޙުގެ ފޯމު ހުށަހަޅުއްވާފައިވާއިރު، އެމަނިކުފާނުގެ މި ދައުރުގެ ރަނިންމޭޓަކު ކަމުގައި ހަމަޖައްސަވާފައި ވަނީ ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު އަދި އެމްޑީޕީގެ ޕީޖީ ލީޑަރު މުހައްމަދު އަސްލަމެވެ.  

ކެންޑިޑެސީ ފޯމު ހުށަހެޅުމުގެ މުއްދަތު މާދަމާގެ މެންދުރުފަހު 2:00 އަށް ހަމަވާއިރު، އިންތިހާބުގައި ވާދަކުރައްވާނެ ކަމަށް އިއުލާން ކުރައްވާފައިވާ، ޑިމޮކްރެޓްސް ގެ ކެންޑިޑޭޓު އިލްޔާސް ލަބީބު އާއި، ޖުމްހޫރީ ޕާޓީގެ ލީޑަރު ގާސިމް އިބްރާހިމް އަދި އެމްއާރްއެމް ގެ ކެންޑިޑޭޓު ފާރިސް މައުމޫން ގެ އިތުރުން އަމިއްލަ ކެންޑިޑޭޓް އުމަރު ނަސީރުގެވެސް ރަނިންމޭޓް އަދި އިއުލާން ކުރައްވާފައި ނުވެއެވެ.

މިހާތަނަށް ރަނިންމޭޓަކު ކަނޑައަޅައި ފޯމު ހުށަހެޅުނީ ރައީސް ޞާލިހުގެ އިތުރުން ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރިޔާސީ ކެންޑިޑޭޓު އަދި ކުރީގެ ރައީސް، ރައީސް ޔާމީން އަބްދުލްގައްޔޫމް އަށެވެ. އެހެންނަމަވެސް، އެމަނިކުފާނުގެ ފޯމު އީސީން ބަލައިނުގަންނައިރު، އެ މައްސަލަ ޔާމީނުގެ ފަރާތުން ސުޕްރީމް ކޯޓަށް ވަނީ ވައްދާފައެވެ. މައްސަލާގެ ހުކުމް އިއްވުން އޮތީ މިއަދު ހެނދުނު 10:00 ގަ އެވެ.