އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ގެ ކެންޑިޑެސީ ބާތިލް ކުރަން އިލެކްޝަންސް ކޮމިޝަނުން ނިންމި ނިންމުމަށް ދިވެހިރާއްޖޭގެ ސްޕްރީމް ކޯޓުންވެސް ތާއީދު ކޮށްފިއެވެ. 

ރައީސް ޔާމިނުގެ ކެނޑިޑެސީ ފޯމު ޕީޕީއެމުން އިލެކްޝަންސް ކޮމިޝަނަށް ހުށައެޅީ އޮގަސްޓު 1 ގަ އެވެ. ހަމަ އެދުވަހު އީސީން ވަނީ ރައީސް ޔާމިނުގެ ކެނޑިޑެސީ ފޯމު ބަލައިނުގަތުމަށް ނިންމާފަ އެވެ. ސަބަބެއްކަމަށް އީސީން ބުނެފައިވަނީ އެމަނިކުފާނަކީ މިވަގުތު ޖަލު ހުކުމެއް ތަންފީޒު ކުރައްވަމުން ގެންދަވާ ފަރާތަކަށް ވުމެވެ. 

އެއާއެކު ރައީސް ޔާމީން ގެ ފަރާތުން ވަނީ އެ މައްސަލަ ސްޕްރީމް ކޯޓުގައި އިސްތިއުނާފް ކުރައްވާފައެވެ.

އެ މައްސަލައިގެ އަޑު އެހުން ހުކުރު ދުވަހު ހަވީރު 3:45 ގައި ފެށިގެން 7 ގަޑިއިރު ވަންދެން ކުރިއަށް ގެންގޮސްފައި ވާއިރު، މައްސަލަ ހުށަހެޅި ފަރާތް، މައްސަލަ ރައްދުވާ ފަރާތުގެ އިތުރުން މައްސަލައިގައި ތަދައްހުލުވެފައިވާ ފަރާތްތަކަށް ވާހަކަ ދެއްކުމުގެ ފުރުސަތު ފަނޑިޔާރުންގެ ބެންޗުން ވަނީ ދެއްވާފައެވެ.

މި ޝަރީއަތުގެ އަޑުއެހުމުގައި އިލެކްޝަންސް ކޮމިޝަންގެ ވަކީލް، މަހްފޫޒް ސައީދު ވަނީ ރައީސް ޔާމީނަށް އިންތިހާބުގައި ކުރިމަތި ނުލެވޭކަން ކަނޑައަޅާފައިވަނީ ހަމައެކަނި ޤާނޫނުގެ 109 ވަނަ މާއްދާގެ (ޅ) އާއި ގުޅިގެން ނޫން ކަމަށް ވިދާޅުވެފައެވެ. އަދި އެކަން އެގޮތަށް ނިންމާފައިވަނީ އެމަނިކުފާނުގެ މައްޗަށް "ސާބިތު ދަރަންޏެއް" ވެސް އޮތުމުން ކަމަށް މަހްފޫޒް ވިދާޅުވިއެވެ.

އެކަމާއި ގުޅިގެން ރައީސް ޔާމީންގެ ވަކީލް، ހަމްޒާ ލަތީފް ވިދާޅުވީ، އިލެކްޝަނުން އެންމެ ފުރަތަމަ ފޮނުވި ލިޔުމުގައި "ސާބިތު ދަރަންޏެއް"ގެ ވާހަކަ ނެތް ކަމަށެވެ. އެހެންކަމުން އެކަން ހިނގާދިޔަ ގޮތް ކިޔާ ދިނުމަށް އީސީގެ ވަކީލުންނަށް ފުރުސަތު އެރުވުމުން މަހްފޫޒު ވިދާޅުވީ، އެންމެ ފުރަތަމަ ފޮނުވި ލިޔުމުގައި "ސާބިތު ދަރަނީ"ގެ ވާހަކަ ނެތް ކަމަށާއި އެކަން އެގޮތަށް ހިނގާދިޔައީ އިދާރީ އޮޅުމަކުން ކަމަށެވެ.

ނަމަވެސް ފަހުން އެކަން ޕާޓީއަށް އަންގާފައިވާ ކަމަށް މަހްފޫޒު ވިދާޅުވިއެވެ. ފަހުން ވާހަކަ ދައްކަވަމުން ޔާމީންގެ ވަކީލް، ހަމްޒާ ވަނީ ފަސް މިލިއަން ޑޮލަރުގެ ޖޫރިމަނާއެއް ދެއްކުމަށް ކްރިމިނަލް ކޯޓުން ކޮށްފައިވާ ހުކުމާ އެއްގޮތަށް އެ ދަރަނި ނުދައްކާތީ ވެސް ކެންޑިޑެސީ ބާތިލުވާނެ ކަމަށް އިލެކްޝަންސް ކޮމިޝަނުން ބުނާ ނުކުތާއަށް ޗެލެންޖު ކުރަން ޔާމީންގެ ވަކީލުން ޝަރީއަތުގައި އެދިވަޑައިގެންފައެވެ.

އަޑުއެހުންތައް ނިންމާލުމަށް ދިން ފުރުސަތުގައި އީސީގެ ވަކީލުންނާއި މައްސަލައިގައި ތަދައްހުލު ކުރުވި، އެޓާނީ ޖެނެރަލްގެ ވަކީލުން ވަނީ ރައީސް ޔާމީނަށް އިންތިހާބުގައި ވާދަ ނުކުރެއްވޭނެ ކަމަށް އީސީން ނިންމި ނިންމުން ދަމަހައްޓަން އެދިވަޑައިގެންފައެވެ.

މި މައްސަލައިގެ ހުކުމް މިއަދު އިއްވާފައިވާއިރު، ފަނޑިޔާރު ހުސްނުއްސުޢޫދު ވަނީ ރައީސް ޔާމީން ޖަލު ހުކުމް ތަންފީޒް ކުރައްވަމުން ގެންދަވާތީ، އާއި އެމަނިކުފާނުގެ ސާބިތު ދަރަންޏެއް އޮތުމުން އިންތިހާބުގައި ވާދަ ނުކުރެވޭނެ ކަމަށް އިލެކްޝަންސް ކޮމިޝަނުން ނިންމި ނިންމުމަށް ތާއީދު ކުރައްވައި ހުކުމް ކުރައްވާފައެވެ. 

ރައީސް ޔާމީންގެ ކެންޑިޑެސީ ބާތިލްކަމަށް ސްޕްރީމް ކޯޓުން ވެސް މި ނިންމި ނިންމުމާއެކު، ދެން ޕީޕީއެމް/ޕީއެންސީގެ ފަރާތުން ރިޔާސީ އިންތިހާބުގައި ވާދަކުރައްވާނީ މާލެ ސިޓީ ކައުންސިލްގެ މޭޔަރު ޑރ މުހައްމަދު މުއިއްޒު އެވެ. މުއިއްޒު ގެ ރަނިންމޭޓަކީ، ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފު (ސެމްބެ) އެވެ.