ކޯޓެއްގެ ޙުކުމަކުން ކުރެވުނު ކަމުގައިވިޔަސް ޖޫރިމަނާއާއި ސާބިތު ދަރަންޏަކީ ތަފާތު ދެ އެއްޗެއް ކަމަށް ކްރިމިނަލް ކޯޓުގެ ކުރީގެ އިސް ގާޒީ އަހުމަދް ހައިލަމް ވިދާޅުވެއްޖެއެވެ.

ހައިލަމް މިހެން ވިދާޅުވީ ރައީސް ޢަބްދުﷲ ޔާމިން ޢަބްދުލްޤައްޔޫމްގެ ކެންޑިޑެސީގެ މައްސަލައިގައި ރައީސް ޔާމީނަށް ރިޔާސީ އިންތިޚާބަށް ކުރިމަރިނުލެވޭނެ ކަމަށް މިއަދު ސްޕްރީމް ކޯޓުން ޙުކުމް ކުރުމާއި ގުޅިގެން ކުރެއްވެވި ޓްވީޓެއްގައެވެ.

އަސާސީ ޙައްޤެއް ޤާނޫނުހަދާމަޖިލީހުން ޤަޞްދުގައި ކަނޑައެޅިގެން ހަނިކުރުމުގެ ނިޔަތް ގެންގުޅެފައިވާކަން މާއްދާއެއްގެ ނައްޞުން ޞަރީޙަގޮތެއްގައި ދޭހަވާން ނެތްނަމަ، އެ މާއްދާއެއް މާނަކުރަންވާނީ އެޙައްޤެއް ގެއްލިގެން ދަޢުވާކުރާފަރާތުގެ މަޞްލަޙަތުގައި ކަމަށް ކުރީގެ ގާޒީ ހައިލަމް ވަނީ ވިދާޅުވެފައެވެ.

ރައީސް ޔާމީންގެ ކެންޑިޑެސީ ފޯމު އޮގަސްޓު 1ވަނަ ދުވަހު އިލެކްޝަންސް ކޮމިޝަނަށް ހުށައެޅުމުން، އެމަނިކުފާނުގެ ކެންޑިޑެސީ ބަލައިގަނެވެން ނެތް ކަމަށް އީސީ އިންވަނީ އަންގައިފައެވެ. ކެންޑިޑެސީ ބަލައިނުގަންނަ ސަބަބެއް ކަމަށް އީސީ އިން ބުނެފައިވަނީ ރައީސް ޔާމީނަކީ ޖަލު ޙުކުމެއް ތަންފީޒު ކުރައްވަމުން ގެންދަވާ ބޭފުޅަކަށްވުމެވެ.

އީސީ އިން އެގޮތައް އެންގުމާއިއެކު ރައީސް ޔާމީންގެ ފަރާތްޕުޅުން ވަނީ އެމައްސަލަ ސްޕްރީމް ކޯޓަށް ހުށައަޅައިފައެވެ.

މިމައްސަލައިގެ އަޑުއެހުން ހުކުރުދުވަހުގެ 3:45ކުން ފެށިގެން އެރޭގެ ވަރަށް ދަން ވަންދެން ވަނީ ކުރިއަށްގެންގޮސްފައެވެ. ރައީސް ޔާމީންގެ ފަރާތުން ހުށައެޅުނު މި މައްސަލައަށް ޕީޕީއެމް އާއި ބަންޑާރަނައިބުގެ އޮފީހުން ވަނީ ތަދައްޚުލް ވެފައެވެ. މިމައްސަލަ ރައްދުވާ ފަރާތްތަކުގެ އިތުރުން މައްސަލައަށް ތަދައްޚުލްވި ފަރާތްތަކަށްވެސް މައްސަލައިގައި ވާހަކަދެއްކުމަށް ފަނޑިޔާރުންގެ ބެންޗުން ވަނީ ފުރުސަތު ދީފައެވެ.

މިއަދު ހެނދުނު 10:00 މިމައްސަލައިގެ ޙުކުމް އިއްވުމަށް ބޭއްވި ޝަރީޢަތުގެ މަޖިލީހުގައި ރައީސް ޔާމީން ގެ ކެންޑިޑެސީ ބާތިލް ކުރަން އިލެކްޝަންސް ކޮމިޝަނުން ނިންމި ނިންމުމަށް ދިވެހިރާއްޖޭގެ ސްޕްރީމް ކޯޓުންވެސް ވަނީ ތާއީދުކޮށްފައެވެ.