މިއަދުވެސް މާލެއަށް އުދައަރާފާނެތީ އުދައަރާ ސަރަހައްދުގައި ސައިކަލު ނުދުއްވުމަށް ފުލުހުން އިލްތިމާސް ކޮށްފިއެވެ.
މިކަމާއި ގުޅިގެން ފުލުހުން ވިދާޅުވެފައިވަނީ މިއަދުވެސް އުދަ އެރުމުގެ ފުރުސަތު އޮތްކަމަށް މޫސުމާއި ބެހޭ ޤައުމީ އިދާރާއިން ލަފާކޮށްފައިވާތި، މެންދުރުފަހު 3 އިން ފެށިގެން ބްރިޖާއި ހައިވޭގައި، ޒަރުރީ ދަތުރުތައް މެނުވީ ނުކުރުމަށް އިލްތިމާސް ކުރާކަމަށެވެ. އަދި އެވަގުތުތަކުގައި ކޮންމެހެން ކުރަންޖެހޭ ދަތުރުތަކަށް، ހަތަރު ފުރޮޅުލީ އުޅަނދު ބޭނުންކުރުމަށް ފުލުހުން އިރުޝާދުދީފައިވެއެވެ.
މީގެ އިތުރުން ފުލުހުން ބުނެފައިވަނީ ދިޔަވަރު ބޮޑުވާ ވަގުތުތަކުގައި ރައްކާތެރިކަމަށް އިސްކަންދެއްވުމަށާއި، މާލެ އާއި ހުޅުލެ ނުވަތަ ހުޅުމާލެ އާ ދެމެދު ޒަރޫރީ ދަތުރުތައްވެސް ކުރައްވާއިރު، ޕަބްލިކް ޓްރާންސްޕޯޓް ނުވަތަ ފެރީ ހިދުމަތް ހިޔާރު ކުރައްވުމަށެވެ.
" ދިމާވާ ހާލަތެއްގެ ސަބަބުން، ތިޔަބޭފުޅުންނަށް އެހީތެރިވެދީ، ޓްރެފިކް ޑައިވަރޓް ކުރަންޖެހިއްޖެ ނަމަ އެކަން ކުރުމަށްޓަކައި އަޅުގަނޑުމެންގެ އޮފިސަރުން މި ސަރަހައްދުތަކުގައި ހަރަކާތްތެރިވަމުން ގެންދާނެ" ފުލުހުން ބުނެފައިވެއެވެ.
އިއްޔެވެސް ބްރިޖް މައްޗަށް ބޮޑު ރާޅެއް އަރައި އެވަގުތު އެސަރަހައްދުން ދަތުރުކުރަމުންދިޔަ ސައިކަލު ތަކުގައި ތިބި މީހުން ވަނީ ރާޅާއި އެކު ވެއްޓިފައެވެ. އަދި ބައެއް މީހުންނަށް އަނިޔާލިބިފައިވާ ކަމަށްވެސް މައުލޫމާތު ލިބިފައިވެއެވެ.
މީގެ އިތުރުން މާލޭ ހެންވޭރު އާޓިފިޝަލް ބީޗާއި ދިމާއިންނާއި އަލިމަސް ކާނިވާ ސަރަހައްދަށް ވަރަށް ބޮޑަށް އުދައަރައިފައިވެއެވެ.
ރާޅާއި އެކު ވެއްޔާއި ގައު މަގުތަކަށް އަރައި އާންމުންނަށް ދަތިތަކެއް ވަނީ ކުރިމަތިވެފައެވެ.
Advertisement
This content is created and paid for by advertisers and does not involve Voice Journalists
