މިއަހަރުގެ ސެޕްޓެމްބަރު މަހުގެ 9 ވަނަ ދުވަހު ބޭއްވުމަށް ތައްޔާރުވަމުންދާ ރިޔާސީ އިންތިހާބުގައި އަމިއްލަ ގޮތުން ވާދަކުރައްވަން ނިންމަވާފައިވާ ކަން ރައީސް މައުމޫނު އިސްވެ ހުންނަވައި އުފެއްދެވީ ޕާޓީ، އެމްއާރުއެމް ގެ ރައީސް ފާރިޝް މައުމޫން އިއުލާނު ކުރައްވައިފިއެވެ. 

ފާރިޝް މިކަން އިއުލާން ކުރައްވައިފައި ވަނީ މިއަދު ހާވީރު އެ ބޭފުޅާގެ އަމިއްލަފުޅު ޓުވިޓަރ އެކައުންޓްއިން އާންމު ކުރެއްވި ވީޑިއޯއެއް މެދުވެރިކޮށެވެ.

ފާރިޝް ރިޔާސީ އިންތިހާބުގައި ވާދަކުރައްވާނެކަމަށް މީގެ ކުރިން ބެލެވުނީ އެމްއާރުއެމް ގެ ފަރާތުން ނަމަވެސް، ބެލެވޭ ގޮތުގައި ފާރިޝް އަމިއްލަ ގޮތުން ނިކުންނަވަން ނިންމެވީ 3000 މެމްބަރުން ހަމަ ނުވާ ޕާޓީތައް އުވާލުމަށް ގާނޫނުގައި ލާޒިމްކޮށްފައިވާ ކުރުމުގެ ދަށުން އެ ޕާޓީ އުވާލުމަށް އިލެކްޝަންސް ކޮމިޝަނުން ނިންމާފައިވާތީއެވެ. 

Advertisement

ރިޔާސީ އިންތިހާބުގައި ވާދަކުރާއްވާނެކަން އިއުލާނު ކުރެއްވި ނަމަވެސް އަދި މިހާތަނަށް އެ ބޭފުޅާގެ ކެންޑިޑެސީ އިލެކްޝަންސް ކޮމިޝަނަށް ހުށަހަޅާފައެއް ނުވެއެެވެ. 

އެހެން ނަމަވެސް ފާރިޝް ރިޔާސީ އިންތިހާބުގައި ވާދަކުރެއްވުމަށްޓަަކައި ސޮއި ހަމަކުރުނުމުގެ ދަށުން 1500 ސޮއި ހަމަ ވެފައިވާކަމަށް ފާއިތުވި ހަފްތާގައި ފާރިޝްގެ ކެމްޕެއިން ޓީމުން ވަނީ ބުނެފައެވެ.