މި އަހަރުގެ ސެޕްޓެމްބަރު 9 ވަނަ ދުވަހު ބޭއްވުމަށް ތައްޔާރުވަމުން އަންނަ ރިޔާސީ އިންތިހާބުގައި ވާދަކުރެއްވުމަށްޓަކައި އަދި މިހާތަނަށް ލިބިފައިވަނީ ހަތަރު އެޕްލިކޭޝަން ކަމަށާއި، ރިޔާސީ އިންތިހާބުގައި ވާދަކުރުމަށް ފޯމު ހުށަހެޅުމުގެ ސުންގަޑި މާދަމާއަށް ހަމަވާނެ ކަމުގައި އިލެކްޝަން ކޮމިޝަނުން ބުނެފިއެވެ. 

އެ ކޮމިޝަންގެ ނައިބްރައީސް އިސްމާއިލް ހަބީބް މިއަދު ކުރެއްވި ޓުވީޓެއްގައި ބުނެފައިވަނީ މިހާތަނަށް ލިބުނު ހަތަރު އެޕްލިކޭޝަންގެ ތެރެއިން ޖަވާބު އެރުވިފައިވަނީ އެއް އެޕްލިކޭޝަންއަށް ކަމުގައެވެ. 

މީގެ އިތުރުން ހަބީބްގެ ޓުވީޓުގައި ވަނީ އެޕްލިކޭޝަން ހުށަހެޅުން އެންމެ ފަހު ވަގުތަށް ފަސްކޮށްފިނަމަ، އެޕްލިކޭޝަން ފުރިހަމަނުވާ ހާލަތެއްގައި މާދަމާ 14:00 ގެ ފަހުން އިތުރު އެއްވެސް ލިޔެކިޔުމެއް އިލެކްޝަންސް އަށް ހުށަހެޅުމުގެ ފުރުސަތު ނުލިބިދާނެތީ، އެޕްލިކޭޝަންތައް ހުށަހެޅުން ވީހައިވެސް އަވަސްކުރުމަށް އިލްތިމާސް ކުރައްވައިފައެވެ. 

މި އަހަރުގެ ރިޔާސި އިންތިހާބުގައި ވާދަކުރައްވާނެކަން ގިނަ ޕާޓީ ތަކަކުން އިއުލާނު ކޮށްފައިވާއިރު މިހާތަަނަށް އިލެކްޝަންސް އަށް އެޕްލިކޭޝަން ހުށަހަޅައިފައިވަނީ، އެމްޑީޕީގެ ކެނޑިޑޭޓް ރައީސް ސޯލިހާއި، އެމްއެންޕީގެ ކެނޑިޑޭޓް، އަބްދުﷲ ނާޒިމްއާއި، ޑިމޮކްރެޓްސްގެ ކެނޑިޑޭޓް އިލިޔާސް ލަބީބްގެ އިތުރުން ޕީޕީއެމްގެ ކެނޑިޑޭޓް އަބްދުﷲ ޔާމީނެވެ. 

މި ބޭބޭފުޅުންގެ ތެރެއިން ކުރީގެ ރައީސް ޔާމީނުގެ ކެންޑިޑެސީ ބަލއި ނުގަތުމަށް ނިންމައި އެކަން އިލެކްޝަންސް ކޮމިޝަނުން އެ ޕާޓީއަށް އެންގުމާއެކު، އިލެކްޝަންގެ ނިންމުން ބަލައި ނުގަންނަ ކަމަށްބުނެ އެ ޕާޓީން ވަނީ އެ މައްސަލަ ސުޕްރީމް ކޯޓަށް ހުށަހަޅައިފައެވެ. އެހެން ނަމަވެސް މައްސަލަ ބެލުމަށްފަހު ސުޕްރިމް ކޯޓުން ވަނީ ރައީސް ޔާމިންގެ ކެންޑިޑެސީ ބަލައިނުގަތުމަށް އިލެކްޝަންސް ކޮމިޝަނުން ނިންމި ނިންމުމަކީ ރަނގަޅު ނިންމުމެއް ކަމުގައި ކަނޑައަޅައިފައެވެ. މިއާއެކު މި އަހަރުގެ އިންތިހާބުގައި ވާދަކުރުމުގެ ފުރުސަތު އެ މަނިކުފާނަށް ވަނީ އެއްކޮށް ބަންދުވެފައެވެ.