މިހާރު ކުރިއަށްދާ ނޯތު އަދި ސެންޓްރަލް އެމެރިކާ ލީގު ކަޕްގެ ދެވަނަ ބުރުގައި އެފްސީ ޑަލަސް އާއި ވާދަކުރި މެޗު 4-4 ގެ ނަތީޖާއަކުން އެއްވަރުވެ، ޕެނަލްޓީގައި 4-5 ގެ ނަތީޖާއަކުން މޮޅުވެ މުބާރާތުގެ ކުއާޓާ ފައިނަލުން އިންޓަ މިއާމީ ޖާގަ ހޯދައިފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އިންޓަ މިއާމީ އިންނެވެ. މި ލަނޑު މެޗު ފެށިގެން ހަވަނަ މިނެޓުގައި ކާމިޔާބުކޮށްދިނީ އާޖެންޓީނާގެ ކެޕްޓަން ލިއޮނަލް މެސީ އެވެ.

މިއީ އެޓީމުގެ ސްޕެނިޝް ޑިފެންޑަރު ޖޯޑީ އަލްބާ ތަނަވަސްކޮށްދިން ފުރުސަތެއްގައި ޑަލަސްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި މިއީ މިސީޒަނުގައި އެޓީމާއި ގުޅުނު މެސީ މި މުބާރާތުގައި އެޓީމަށް ކުޅެދިން ހަތަރު މެޗުގައި ކާމިޔާބުކުރި ހަވަނަ ލަނޑެވެ.

ޑަލަސް އިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 37 ވަނަ މިނެޓުގައި ކާމިޔާބުކޮށްދިނީ އެޓީމުގެ އާޖެންޓީނާ މިޑްފީލްޑަރު ފަކުންޑޯ ކުއިގްނެން އެވެ. މިއީ އެޓީމުގެ އެމެރިކާ ޑިފެންޑަރު މާކޯ ފަރުފޭން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގައި ފުރަތަމަ ފަހަރަށް ޑަލަސް އިން ލީޑު ހޯދި ލަނޑު ފުރަތަމަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ ޓެންޒޭނިއާގެ ފޯވާޑް ބެރަނާޑް ކަމުންގޯ އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން އެފްސީ ޑަލަސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މި މެޗުގައި ޑަލެސް އިން ކާމިޔާބުކުރި ތިންވަނަ ލަނޑު ފަހުހާފުގެ 63 ވަނަ މިނެޓުގައި ކާމިޔާބުކޮށްދިނީ އާޖެންޓީނާގެ ފޯވާޑް އެލަން ވެލާސްކޯ އެވެ. ނަމަވެސް އޭގެ ދެ މިނެޓު ފަހުން އިންޓަ މިއާމީ އިން ވަނީ ލަނޑެއް ކާމިޔާބުކޮށް ނަތީޖާ ފަރަގު ކުޑަކޮއްފައެވެ.

މިލަނޑު އެޓީމަށް ކާމިޔާބުކޮށްދިނީ އެޓީމުގެ އެމެރިކާ މިޑްފީލްޑަރު ބެންޖަމިން ކްރެމާސްކީ އެވެ. ނަމަވެސް އޭގެ ތިން މިނެޓު ފަހުން އަނެއްކާ ވެސް ޑަލަސް އިން ވަނީ ލަނޑެއް ކާމިޔާބުކޮށް ދެ ލަނޑުގެ ލީޑެއް ނަގާފައެވެ. މިއީ އިންޓަ މިއާމީގެ ފިންލޭންޑް މިޑްފީލްޑަރު ރޮބަޓް ޓެއިލަރ އަތުން ބައިކޮޅަށް ވަން ލަނޑެކެވެ.

މި ނަތީޖާއާއެކު މެޗު ނިމެން ދަނިކޮށް އިންޓަ މިއާމީ އިން ވަނީ މެޗުގެ ފަހު 10 މިނެޓުތެރޭގައި ދެ ލަނޑު ކާމިޔާބުކޮށްދިން މެޗުގެ ނަތީޖާ އެއްވަރުކޮށްފައެވެ. އެގޮތުން ދެ ވަނަ ހާފުގެ 80 ވަނަ މިނެޓުގައި ޑަލަސްގެ ޑިފެންޑަރު މާކޯ ފަރުފޭން އަތުން ބައިކޮޅަށް ވަން ލަނޑާއެކު އެޓީމުން ނަތީޖާގެ ފަރަގު ކުޑަކުރި އިރު، އޭގެ ފަސް މިނެޓު ފަހުން އެޓީމަށް މެޗުގެ ނަތީޖާ އެއްވަރުކޮށްދިން ލަނޑު ކާމިޔާބުކޮށްދިނީ މެސީ އެވެ. މިލަނޑާއެކު މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 4-4 ގެ ނަތީޖާއަކުން އެއްވަރުވެފައެވެ.

މިއާއެކު ނަތީއްޖާނެރުމަށްޓަކައި ޖެހި ޕެނަލްޓީގައި އިންޓަ މިއާމީ ކުރި ހޯދީ 4-5 ގެ ނަތީޖާއަކުންނެވެ.