ރިޔާސީ އިންތިޚާބުގައި މިނިވަން ކެންޑިޑޭޓެއްގެ ގޮތުގައި ވާދަ ކުރެއްވާނެކަން އިޢުލާނު ކުރައްވާފައިވާ ކުރީގެ ރައީސް މައުމޫން ޢަބްދުލް ޤައްޔޫމްގެ ދަރިކަލުން ފާރިސް މައުމޫންގެ ކެންޑިޑެސީ ފޯމު ހުށައަޅައިފިއެވެ.
ފާރިސް މައުމޫންގެ ރަނިންގމޭޓަކަށް ހަމަޖައްސަވައިފައިވަނީ ޑރ ޢަބްދުއްސައްތާރު ޔޫސުފެވެ.
ފުރަތަމަ ޤަބޫލުކުރެވުނީ ފާރިސް ރިޔާސީ އިންތިޚާބަށް ނުކުންނަވާނީ އެމަނިކުފާނު ހިންގަވާ ޕާޓީ އެމްއާރްއެމުން ކަމަށެވެ. ނަމަވެސް އެމްއާރްއެމްގެ މެމްބަރުން ހަމަނުވާ ކަމަށްބުނެ އީސީ އިން ވަނީ އެޕާޓީ އުވައިލައިފައެވެ. އަދި މިހާރު އެމައްސަލަ އޮތީ ކޯޓުގައެވެ.
ފާރިސް ރިޔާސީ އިންތިޚާބުގައި ވާދަކުރެއްވުމަށް ތާއީދު ކުރެއްވުމަށް ރައީސް މައުމޫނާއި އަނބކަނބަލުން ނަސްރީނާ ވަނީ ސޮއިކުރައްވައިފައެވެ.
ރިޔާސީ އިންތިޚާބަށް ނަން ހުށައެޅުމުގެ މުއްދަތު މިއަދަށް ހަމަވާއިރު މިހާތަނަށް އީސީ އަށް 6 ބޭފުޅަކު ވަނީ ރިޔާސީ އިންތިޚާބުގައި ވާދަކުރެއްވުމަށް ނަންހުށައަޅުއްވައިފައިވެއެވެ.
އެގޮތުން ޕީޕީއެމުން ރައީސް ޢަބްދުﷲ ޔާމިން ޢަބްދުލް ޤައްޔޫމްގެ ނަން އޮގަސްޓު 1 ވަނަ ދުވަހު ހުށައެޅުމުން އީސީ އިން ވަނީ ރައީސް ޔާމިންގެ ނަންފުޅު ބަލައިނުގަތުމަށް ނިންމައިފައެވެ.
ރައީސް ޔާމިންގެ އިތުރުން އެމްޑީޕީ ކޯލިޝަނުން ރައީސް އިބްރާހިމް މުޙައްމަދު ޞާލިޙް، އެމްއެންޕީ އިން މުޙައްމަދު ނާޒިމް، ޑިމޮކްރެޓްސް އިން އިލްޔާސް ލަބީބް، ޕީއެންސީ އިން ޑރ މުޙައްމަދު މުޢިއްޒު އަދި މިނިވަން ކެންޑިޑޭޓް ފާރިސް މައުމޫނެވެ.
Advertisement
This content is created and paid for by advertisers and does not involve Voice Journalists
