އަމިއްލަގޮތުން ރިޔާސީ އިންތިޚާބުގައި ވާދަކުރައްވާނެކަން އިއުލާނުކުރެވި ކުރީގެ ބަންޑާރަ ނައިބު ޑރ މުޙައްމަދު މުނައްވަރު ރިޔާސީ އިންތިޚާބުގައި ވާދަނުކުރައްވަން ނިންމަވާ އެކަން އިއުލާނުކުރައްވައިފި އެވެ. 

ޑރ މުނައްވަރު ވަނީ ރިޔާސީ އިންތިޚާބުގައި ވާދަކުރައްވާނެކަން އިއުލާނު ކުރައްވާފަ އެވެ. އަދި ރިޔާސީ އިންތިޚާބުގައި ވާދަކުރައްވަން ނިންމެވީ ޤައުމުގެ ހާލަތު އޮތް ގޮތުން ކަމަށާއި، ދިވެހި ގައުމުގެ މިނިވަންކަމާއި އިސްތިގުލާލަށް ވަރަށް ބޮޑަށް ބުރޫއަރާފައިވާކަން އޭރު ޑރ މުނައްވަރު ގެންދެވީ ފާހަގަކުރައްވަމުން ނެވެ. 

އޭގެ އިތުރުން ދިވެހިރާއްޖޭގެ ސަރަހައްދުން ބައެއް ސަރުކާރުގެ އިހުމާލުން ގެއްލިގެން ގޮސްފައިވާކަން ފާހަގަކުރައްވާ ޑރ މުނައްވަރު ގެންދެވީ އަޑުއުފުއްލަވަމުން ނެވެ. އަދި ރާއްޖޭގެ ސަރަހައްދާއި ގުޅޭ މައުލޫމާތުތައް އޭނާ ގެންދެވީ ހިއްސާކުރައްވަމުންނެވެ. 

Advertisement

ޑރ މުނައްވަރު އޭރު ވިދާޅުވަމުން ގެންދެވީ، ކަނޑުގެ ސަރަހައްދުން ބޮޑު ބައެއް ގެއްލިގެން ދިއުމުގެ ޒިންމާ ސަރުކާރުން ފުރިހަމަޔަށް ނަގަން ޖެހޭ ކަމަށެވެ. އަދި މި ސަރުކާރު ބަދަލުކުރަން ޖެހޭ ކަމަށެވެ. 

މިއަދަކީ ރިޔާސީ އިންތިޚާބަށް ކުރިމަތިލުމުގެ ފަހު ދުވަސްކަމަށް އިލެކްޝަންސް ކޮމިޝަނުން ކަނޑައަޅާފައިވާއިރު، ޑރ މުނައްވަރު ކުރި ޓްވީޓެއްގައި ވަނީ ރިޔާސީ އިންތިޚާބަށް ވާދަނުކުރައްވަން ނިންމަވާފައިވާކަން އިއުލާނު ކުރައްވާފަ އެވެ. 

އޭނާ އިންތިޚާބުގައި ވާދަނުކުރަން ނިންމެވި ނަމަވެސް އޭނާއަށް ތާއީދުކޮށް އެ މަސައްކަތުގައި އެހީތެރިކަން ފޯރުކޮށްދެއްވި ހުރިހާ ފަރާތްތަކަށް ޝުކުރު އަދާކުރައްވާކަމަށް ޑރ މުނައްވަރު ވިދާޅުވި އެވެ. 

ރިޔާސީ އިންތިޚާބުގައި ވާދަނުކުރަން ނިންމެވި ނަމަވެސް ދެން އިތުރަށް އޭނާ ސިޔާސީ ގޮތުން ކުރިއަށް ވަޑައިގަންނަވާނެ ގޮތެއް އަދި ހާމަކުރައްވާފަ އެއް ނުވެއެވެ. އަދި ވަކި ޕާޓީއަކާއި ގުޅިވަޑައިގަންނަވާނެ ކަމެއް ވެސް ހާމަކުރައްވާފަ އެއް ނުވެއެވެ.