ސެޕްޓެމްބަރ 9ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވާދަކުރުމަށް ޖުމްހޫރީ ޕާޓީގެ ކެންޑިޑޭޓު ޤާސިމް އިބްރާހިމްގެ ފޯމު އިލެކްޝަންސް ކޮމިޝަނަށް ހުށައަޅައިފިއެވެ.
ޤާސިމް އާއި އެކު އެމަނިކުފާނުގެ ރަނިންގމޭޓެއްގެ ގޮތުގައި ވާދަކުރައްވާނީ ޑރ އަމީން އިބްރާހިމެވެ.
ޑރ އަމީންއަކީ ރައީސް ޢަބްދުﷲ ޔާމިންގެ ދައުރުގައި ޓްރާންސްޕޯޓް މިނިސްޓަރުކަން ކުރެއްވެވި ބޭފުޅެކެވެ. މީގެ އިތުރުން އަމީން އަކީ ޖޭޕީ އާއި ޤާސިމްގެ ސިޔާސީ މަސައްކަތްތަކުގައި ވަރަށް ބޮޑަށް ހަރަކާތްތެރިވާ ބޭފުޅެކެވެ.
ޤާސިމްގެ ކެންޑިޑެސީ ފޯމު ހުށައެޅުމަށް ޤާސިމްގެ އަރިހުގައި މިސަރުކާރުގެ ޓްރާންސްޕޯޓް މިނިސްޓަރ އަދި ޤާސިމްގެ އަނބިކަނބަލުން ޢާއިޝަތު ނަހުލާވެސް ބައިވެރިވެވަޑައިގަތެވެ.
އަދި ދާދިފަހުން އެޕާޓީއާއި ގުޅިވަޑައިގެންނެވި ކުރީގެ އެޑިޔުކޭޝަން މިނިސްޓަރ ޑރ މަޙްމޫދް ޝައުޤީވެސް ބައިވެރިވެވަޑައިގެންނެވިއެވެ.
މިއަހަރުގެ ރިޔާސީ އިންތިޚާބުގައި ޖުމްލަ 7 ކެންޑިޑޭޓަކު ވާދަކުރައްވާއިރު އޭގެ ތެރެއިން ކޯލިޝަނަކުން ވާދަކުރައްވަނީ ރައީށް އިބްރާހިމް މުޙައްމަދު ޞާލިޙާ، ޕީޕީއެމް ޕީއެންސީ ކޯލިޝަނުން ޑރ މުޙައްމަދު މުޢިއްޒުއެވެ.
މިނިވަން ކެންޑީޑޭޓުންގެ ގޮތުގައި ކުރީގެ ހޯމް މިނިސްޓަރ އުމަރު ނަސީރާއި ކުރީގެ ރައީސް މައުމޫނު ޢަބްދުލްޤައްޔޫމްގެ ދަރިކަލުން ފާރިސް ވެސް ހިމެނެއެވެ.
ދެން އިންތިޚާބުގައި ވާދަކުރައްވަން ނިންމަވައިފައިވަނީ އެމްއެންޕީ އިން މުޙައްމަދު ނާޒިމް، ޑިމޮކްރެޓްސް އިން އިލްޔާސް ލަބީބް އަދި ޖޭޕީ އިން ޤާސިމް އިބްރާހިމެވެ.
Advertisement
This content is created and paid for by advertisers and does not involve Voice Journalists
