ޑިފެންސް މިނިސްޓްރީގެ ނައިބަކަށް ކުރިން ހުންނެވި ޙަސަން ޒަމީލް އަމިއްލަގޮތުން ރިޔާސީ އިންތިޚާބުގައި ވާދަކުރެއްވުމަށް ކެންޑިޑެސީ ފޯމު ހުށައަޅުއްވައިފިއެވެ.
ރިޔާސީ އިންތިޚާބަށް ޒަމީލް ކުރިމަތިލެއްވި އިރު އޭނާގެ ރަނިންގމޭޓަކަށް ހޮއްވަވާފައިވަނީ އޭނާގެ އަނބިކަނބަލުން މަރިޔަމް އަލީމް އެވެ. އަދި ޒަމީލްގެ އިންތިޚާބީ އޭޖެންޓަކަށް ހަމަޖައްސަވައިފައިވަނީ އޭނާގެ ދަރިކަލުން އަހްމަދު މަހްރާން ޒަމީލެވެ.
ޒަމީލުގެ ފޯމާއި އީސީގެ ފަރާތުން ހަވާލުވެވަޑައިގަތީ ރައީސް ފުއާދު ތައުފީޤެވެ.
ޒަމީލްއަކީ ޤާނޫނީ ދާއިރާއިން މާސްޓާސް ހާސިލް ކުރައްވާފައިވާ ބޭފުޅެކެވެ. ޒަމީލު ވަނީ ޓޫރިޒަމް މިނިސްޓްރީގެ ޑެޕިއުޓީ ޑިރެކްޓަރު ޖެނެރަލްގެ މަގާމު ވެސް ފުރުއްވާފައެވެ.
ޒަމީލްގެ ރަނިންމޭޓަކަށް އައްޔަން ކޮށްފައިވާ މަރިޔަމް ވަނީ އެޓޯލްސް މިނިސްޓްރީގައި 21 އަހަރު ހިދުމަތް ކުރައްވާފައެވެ. އަދި ޕްރޮސިކިއުޓާ ޖެނެރަލް އޮފީހުގައި 11 އަހަރު ހިދުމަތް ކުރެއްވިއެވެ.
މިއީ ދެމަފިރިޔަކު ރާއްޖޭގެ ރައީސް ކަމަށާއި ނައިބު ރައީސް ކަމަށް ކުރިމަތިލި ފުރަތަމަ ފަހަރެވެ.
ރިޔާސީ އިންތިޚާބަށް ޒަމީލްގެ ނަން ހުށައެޅުއްވުމާއި އެކު އަމިއްލަ ގޮތުން ވާދަކުރައްވާ 3 ކެންޑިޑޭޓަކު ސެޕްޓެމްބަރ 9 ވަނަ ދުވަހު ބާއްވާ ރިޔާސީ އިންތިޚާބުގައި ވާދަކުރައްވާނެއެވެ. އެއީ ކުރީގެ ހޯމް މިނިސްޓަރ ޢުމަރު ނަސީރު، ކުރީގެ ރައީސް މައުމޫން ޢަބްދުލްޤައްޔޫމްގެ ދަރިކަލުން ފާރިސް މައުމޫން އަދި ޙަސަން ޒަމީލެވެ.
މިއަހަރުގެ ރިޔާސީ އިންތިޚާބުގައި 8 ކެންޑިޑޭޓަކު ވާދަކުރައްވާނެއެވެ.
Advertisement
This content is created and paid for by advertisers and does not involve Voice Journalists
