އިދިކޮޅު ފަރާތްތަކުން ނުވާނެއޭ ބުނި ކަންތައްތައް ދަނީ ކޮށް ނިމެމުން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ރިޔާސީ އިންތިޚާބުގެ ކެމްޕޭނަށް މިއަދު ދ އަތޮޅަށް ކުރައްވަމުން ގެންދަވާ ދަތުރުފުޅުގައި ދ މީދޫއަށް ވަޑައިގެން އެރަށު ރައްޔިތުންނާއި އެކު ބޭއްވެވި ޖަލްސާގައި ވާހަކަފުޅު ދައްކަވަމުންނެވެ.

"2018 ގައިވެސް އަޅުގަނޑުމެން ވެރިކަމަށް އައީ ސިޔާސަތު ތަކަކާއި އެކު، އޭރު ބުނަމުންގެންދިޔައީ ތިކަމެއް ނުވާނެއޭ" ރައީސް ވިދާޅުވިއެވެ.

ރައީސް ވިދާޅުވީ މިނިމަމްވޭޖް ކަނޑައަޅާ ވާހަކައާއި ސިވިލް ސަރވެންޓުންގެ މުސާރަ ބޮޑު ކުރާ ވާހަކައާއި ފެނާއި ނަރުދަމާ ހުރިހާ ރަށެއްގައި އަޅައިދޭ ވާހަކައާއި، ދަތުރުފަތުރު އަވަސްކޮށް ސްޕީޑް ބޯޓުން ގުޅައިދޭ ވާހަކަ ދެކެވުމުން ނުވާނޭ ކަމަށް ބުނި ކަމަށެވެ.

ނަމަވެސް މިކަންކަން މިހާރު އަންނަނީ ކުރެވި ނިމެމުން ކަމަށް ރައީސް ޞާލިޙް ވިދާޅުވިއެވެ.

މީގެއިތުރުން ކޮވިޑްގެ ޢާލަމީ ވަބާ ކުރިމަތިވުމުން ކޮންޓްރޯލް ނުކުރެވޭނެ ކަމަށް ބުނިކަމަށާއި، ރާއްޖޭގެ އާބާދީގެ ބޮޑު ބައެއް މަރުވެގެން ދާނެ ކަމަށް ބުނި ކަމަށެވެ.

ޓޫރިޒަމް މުޅިން ހަލާކުވެ، ރިސޯޓުތައް އަލުން ނުހުޅުވޭނެ ކަމަށް ބުނި ކަމަށް ރައީސް ވިދާޅުވިއެވެ. އަދި ބޯޑަރު ނުހުޅުވައި ރިސޯޓުތައް މަސްކައްކާ ބަދިގެ ތަކަށް ބަދަލުކޮށް ދަނޑު ހެއްދުމަށް ބުނި ކަމަށްވެސް ރައީސް ޞާލިޙް ވިދާޅުވިއެވެ.

އިދިކޮޅު ފަރާތްތަކުން އެހެން ބުނި ނަމަވެސް ކޮވިޑްވެސް ކޮންޓްރޯލް ކުރެވި، ބޯޑަރު ހުޅުވައި ފަތުރުވެރިންވެސް އަންނަން ފަށައިފިކަމަށް ރައީސް ވިދާޅުވިއެވެ.

ރައީސް ޞާލިޙް ވިދާޅުވީ ހުރިހާ ރައްޔިތުންގެ ތަރައްޤީއަށްޓަކައި މުޅި ޤައުމުގެ ތަރައްޤީއަށްޓަކައި ކުރައްވަން އޮތް އެންމެ ރަނގަޅު ކަމަކީ އެމަނިކުފަނާއި ގުޅިވަޑައިގެން އެމަނިކުފާނަށް ވޯޓު ދެއްވުން ކަމަށެވެ.

ދ އަތޮޅަށް ރައީސް ޞާލިޙް ކުރައްވަމުން މިގެންދަވަ ދަތުރުފުޅުގައި ބައެއް ރަށްރަށުގައި ނިމިފައި ހުރި ތަރައްޤީގެ މަޝްރޫޢުތައް ވަނީ ރަސްމީކޮށް އިފްތިތާޙް ކޮށްދެއްވައިފައެވެ.