ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގދ. އަތޮޅުގެ ރަށްތަކަށް މިއަދު ފެއްޓެވި ކެންޕެއިން ދަތުރުފުޅުގައި މަޑަވެއްޔަށް ވަޑައިގެންނެވުމުން އެ ރަށުގައި އެމަނިކުފާނާއި ދެކޮޅަށް އަޑު އުފުލަމުންދިޔަ ބަޔަކު ގަދަބާރުން، އަނިޔާވެރި ކަމާއިއެކު ހައްޔަރުކުރާ މަންޒަރު ފެންނަ ވީޑިއޯއެއް އާއްމުވެއްޖެ އެވެ.
ރައީސް ޞާލިހުއާއި ދެކޮޅަށް މަޑަވެލީގައި އަޑުއުފުލި މީހުން ވަނީ އެމަނިކުފާނަށް ނިސްބަތްކޮށް "ޗޯރޭ" އާއި "ޗޯރު އިބުރޭ" ގެ ނަމުން މުޚާތަބުކޮށް ގޮވާފައެވެ. އަދި އެމީހުންވަނީ އެމަނިކުފާނުގެ މަގާމުން އިސްތިއުފާ ދެއްވުމަށްވެސް ގޮވާލާފައެވެ.
އެ މަންޒަރުތައް ފޭސްބުކު މެދުވެރިކޮށް ލައިވް ކުރަމުންދިޔަ ކުރީގެ ގދ.އަތޮޅު ކައުންސިލްގެ ރައީސް ސާހިރު ހަސަން ވަނީ އެތަނުގައި ހަރަކާތްތެރިވަމުން ދިޔަ ފުލުހުން ހައްޔަރުކޮށްފައެވެ.
ސާހިރުގެ އިތުރުން، މަޑަވެލި އިހްތިޖާޖު ގެ ތެރެއިން އެ ރަށު ކައުންސިލް މެންބަރު މުހައްމަދު ޝިރާއު ޒާހިރު ހިމެނޭހެން ޖުމުލަ 4 މީހުން ހިމެނެއެވެ.
އިހްތިޖާޖުގެ ވީޑިއޯ ތަކުން ފެންނަ ގޮތުން، ބަންދު ކޮށްފައި އޮތް އެ ސަރަހައްދުގައި ގިނަ އަދަދެއްގެ ފުލުހުން ދިޔައީ ހަރަކާތްތެރިވަމުންނެވެ.
ރައީސް ޞާލިހް މިއަދު މަޑަވެއްޔަށް ވަޑައިގަންނަވަން ހަމަޖެހިފައި އޮއްވާ، އެމަނިކުފާނުގެ ކެންޕެއިން ބައްދަލުވުން ބާއްވަން ހަމަޖެހިފައި އޮތް ތަނަށްވެސް ކަޅުތެޔޮ ޖަހައި ބަޔަކު ވަނީ އެތަން ރޯކޮށްލާފައެވެ. އެހެންކަމުން، އެ ޖަލްސާ ބާއްވަން ޖެހުނީ މަޑަވެލީ ގޮނޑުދޮށުގައެވެ.
Advertisement
This content is created and paid for by advertisers and does not involve Voice Journalists
