ކުރީގެ ރައީސް އަދި ޕީޕީއެމްގެ ލީޑަރ، ރައީސް އަބްދުالله ޔާމީން އަބްދުލްގައްޔޫމަށް، ފޯން ކޯލްތައް ކުރުމަށް މީގެ ކުރިން ދީފައިއޮތް ލުއިތައް މިހާރު ނިމުމަކަށް ގެނެސް، އެތައް ގޮތަކުން އެމަނިކުފާނަށް އަނިޔާ ކުރަމުންދާ ކަމަށް، ކުރީގެ ނާއިބު ރައީސް، އަދި ޔާމިންގެ ގާނޫނީ ވަކީލު، ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ވ. އާރަށް މައްސަލާގައި ރައީސް ޔާމީންގެ މައްޗަށް އުފުލާފައިވާ ދައުވާތައް ސާބިތުވާ ކަމަށް ކަނޑައަޅައި، އެމަނިކުފާނުގެ މައްޗަށް ކްރިމިނަލް ކޯޓުން އިއްވި 11 އަހަރުގެ ޖަލު ހުކުމް ހައިކޯޓުގައި އިސްތިއުނާފު ކޮށްފައިވާއިރު، މައްސަލަ ކުރިއަށް ނުދާތީ އިދިކޮޅު ލީޑަރޝިޕުން މިއަދުވެސް ވަނީ ހައިކޯޓަށް ވަޑައިގެންފައެވެ.
އެއަށްފަހު ނޫސްވެރިންނާއި ބައްދަލު ކުރައްވައި ވާހަކަދައްކަވަމުން، ޔާމީނުގެ އިސް ގާނޫނީ ވަކީލު، ޑރ. ޖަމީލް ވިދާޅުވީ، ހައިކޯޓުގެ މައްސަލަ ލަސް ވުމުގެ ސަބަބުން އިއާދަ ނުކުރެވޭ ވަރުގެ ބޮޑު ގެއްލުމެއް ލިބިގެން ގޮސްފައިވާ ކަމަށެވެ.
"ދިވެހި ރައްޔިތުންގެ ގާތްގަނޑަކަށް އެއްލައްކަ ތިރީހަކަށް ހާސް މީހުންގެ ސަޕޯޓާއި އެކީގައި ކެންޑިޑެސީ ހުށަހަޅާފައިވާ، ރައީސް ޔާމީން ގެ އިންތިހާބީ ހައްގު ގެއްލިގެން މި ދިޔައީ. އެއީ އިއާދަ ކުރެވޭނެ ގެއްލުމެއް ނޫން. އަޅުގަނޑުމެންގެ މުޅި ޕާޓީ އެ އިހްތިޖާޖު ގައި މި އޮތީ، އެއީ އަޅުގަނޑުމެންގެ ދޫކޮށްލާނެ އިހްތިޖާޖު އެއްނޫން. އަޅުގަނޑުމެން ގަބޫލު ކުރަނީ ރާއްޖޭގައި އޮތް އެންމެ ބޮޑު ޕާޓީ، ޕީޕީއެމްގެ ރިޔާސީ ކެންޑިޑޭޓް ބައިވެރި ނުވާ އިންތިހާބަކީ އިންކްލޫސިވް އިންތިހާބެއް ނޫން. އަދި ފެއަރ އިންތިހާބެއް ނޫން ކަމަށް އަޅުގަނޑުމެން ގަބޫލު ކުރަނީ"
ޑރ. މުހައްމަދު ޖަމީލް އަހުމަދު
މިއާއެކު ޖަމީލް ވިދާޅުވީ ހައިކޯޓަށް ވަޑައިގެންނެވީ، ހައިކޯޓުގެ މައްސަލަ ލަސްވުމާއި ގުޅިގެން އެމަނިކުފާނަށް ލިބެމުންދާ ގެއްލުމާއި ޢާއިލާ ތަހައްމަލް ކުރަމުންދާ ވޭނުގެ ސަބަބުން ކަމަށެވެ. އަދި އެކަމަށް ނިމުމެއް އަންނާނީ ހައިކޯޓުގައި އޮތް އަޑުއެހުން ނިންމައިގެން ކަމަށްވެސް ޖަމީލް ވިދާޅުވި އެވެ.
"މިހާރު ޖަލުގައި ހުންނަވައިގެން ކުރައްވާ ހިތްދަތި ކަމުގެ ތެރެއަށް، އިތުރަށް، ސްޕްރީމް ކޯޓުގެ (ކެންޑިޑެސީ) މައްސަލަ އާއި ގުޅިގެން އެމަނިކުފާނަށް އިތުރު ދަތިތަކެއް ޖަލުން ކުރިމަތި ކުރެއްވި ޚަބަރު އެމަނިކުފާނު ވަނީ އިއްޔެ އަޅުގަނޑަށް ވިދާޅުވެފަ. އޭގެ ތެރޭގައި ފޯން ކޯލު ލިބުމާއި، ފޯން ކޯލު ކުރުމަށް ކުރީގައި އޮތް ލުއިތައް މިހާރު ހަގީގަތުގައި ވަނީ ނިމުމަކަށް އައިސްފައި ކަމަށް އެމަނިކުފާނު ވަނީ ވިދާޅުވެފަ."
ޑރ. މުހައްމަދު ޖަމީލް އަހުމަދު
ޖަމީލް ވިދާޅުވީ، ރައީސް ޔާމީން ޖަލުގައި ހުންނަވަނިކޮށް އެމަނިކުފާނުގެ މަންމާފުޅުވެސް ނިޔާވެފައި ވާ ކަމަށާ، ހައިކޯޓުގައި އޮތް ޝަރީއަތް, ނިންމަން ޖެހޭ ސްޕީޑުގައި ނިންމުނު ނަމަ, އެމަނިކުފާނު މިނިވަންވެ މަންމާފުޅާއިވެސް ބައްދަލުކުރެވުނީސް ކަމަށެވެ.
މީގެ އިތުރުން، ޖަމީލް ވަނީ ހައިކޯޓުގައި އޮތް މައްސަލައިގެ އަޑުއެހުމެއް ބުރާސްފަތި ދުވަހަށް ތާވަލްކޮށްފައި ވާކަމަށް އެ ކޯޓުން ބުނެފައިވާކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
