އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ދެވަނަ ބުރުގައި ވާދަވެރި ކުޅުމަކަށްފަހު 1-0 ގެ ނަތީޖާއަކުން ޖެމެއިކާ ބަލިކޮށް ފުރަތަަމަ ފަހަރަށް ކޮލަމްބިއާ އިން ކުއާޓާ ފައިނަލުން ޖާގަ ހޯދައިފި އެވެ.

ކޮލަންބިއާ ވޯލްޑްކަޕްގެ ދެވަނަ ބުރަށް ޖާގަ ހޯދީ ސައުތު ކޮރެއާ އާއި ޖަރުމަނު ފަހަތަށް ޖައްސާލުމަށްފަހު ގުރޫޕް އެޗްގެ އެއްވަނަ ޓީމުގެ ގޮތުގައެވެ. އަދި ޖެމެއިކާ ވޯލްޑްކަޕްގެ ދެވަނަ ބުރުގެ ޖާގައެއް ހޯދީ ވަރުގަދަ ބްރެޒިލް މުބާރާތުގެ ގުރޫޕް ސްޓޭޖުން ކަޓުވާލުމަށްފަހު ގްރޫޕް އެފްގެ ދެވަނަ ޓީމުގެ ގޮތުގައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ދެޓީމު ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ވަރުގަދަކޮށް ފެށީ ކޮލަމްބިއާ އިންނެވެ. އެގޮތުން ދެވަނަ ހާފުގެ ފަސްވަނަ މިނެޓްގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ކެޕްޓަން ކެޓަލީނާ އަސްމީ އެވެ. މިއީ އެޓީމުގެ އަނާ ގުޒްމަން ޖެމެއިކާގެ ޕެނަލްޓީ އޭރިއާ ތެރެއަށް ހުރަސްކޮދިން ބޯޅައެއް ކޮންޓްރޯލް ކުރުމަށް ފަހު ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ނަމަވެސް އޭގެ ދެމިނެޓު ފަހުން މެޗުގެ ނަތީޖާ އެއްވަރު ކުރުމަށް ޖެމެއިކާއަށް ވަނަ ރަނުގެ ފުރުސަތެއް ލިބި ބޭނުން ނުކުރެވިފައެވެ. އެޓީމުގެ ފޯވާޑް ޖޯޑީ ބްރައުން އަށް ލިބުނު ހުސް ފުރުސަތުގައި އޭނާ ބޮލުން ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ.

ކޮލަމްބިއާގެ ލީޑު ފުޅާކުރުމަށް ފަހުހާފުގެ 85 ވަނަ މިނެޓުގައި އެޓީމުގެ މިޑްފީލްޑަރު ސަންތޯސް ހެރެއިރާ އަށް ލިބުނު ހުސް ފުރުސަތުގައި ޖެމެއިކާގެ ޕެނަލްޓީ އޭރިއާ ތެރޭގައި މުޅިން ހުސްކޮށް ހުރެ އޭނާ ބޮލުން ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ކޮލަމްބިއާ ކުރީގައި އޮވެގެންނެވެ.

މުބާރާތުގެ ކުއާޓާ ފައިނަލުން ކޮލަންބިއާ ވާދަކުރަންޖެހެނީ އިންގްލެންޑާއި ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މި މަހުގެ 12 ވަނަ ދުވަހުގެ ހަވީރު ރާއްޖޭ ގަޑިން 15:30 ގައެވެ.