އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ދެވަނަ ބުރުގެ ފަހު މެޗުގައި 4-0 ގެ ނަތީޖާއަކުން ފުރާންސް އަތުން ބަލިވެ، މޮރޮކޯ މުބާރާތުން ކަޓައިފި އެވެ.

މުބާރާތުގައި އަލަށް ވާދަކުރި މޮރޮކޯ ދެވަނަ ބުރުން ޖަގަ ހޯދީ ވަރުގަދަ ޖަރުމަނު މުބާރަތުން ކަޓުވާލުމަށްފަހު ގްރޫޕް އެޗްގެ ދެވަނަ ޓީމުގެ ގޮތުގައެވެ. އަދި ފްރާންސް އެންމެ ފަހުން ކުޅުނު 13 މެޗުގެ ތެރެއިިން އެޓީމު ބަލިވެފައިވަނީ އެންމެ މެޗަކުންނެވެ.

މެޗުގެ ފުރަތަަމަ ހާފުގައި ފްރާންސް އިން ތިން ލަނޑުގެ ލީޑެއް ނެގިއިރު، އެޓީމުގެ ފުރަތަމަ ލަނޑު، ފުރަތަމަ ހާފުގެ 15 ވަނަ މިނެޓުގައި ކާމިޔާބުކޮށްދިނީ އެޓީމުގެ ޕީއެސްޖީ ފޯވާޑް ކަޑިޑިއަޓޫ ޑިއާނީ އެވެ. މިއީ އެޓީމުގެ ޑިފެންޑަރު ސަކީނާ ކަރްޗައުއީ ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި ފުރާންސް އިން ކާމިޔާބުކުރި ދެވަނަ ލަނޑު ފުރަތަމަ ހާފުގެ 20 ވަނަ މިނެޓުގައި ކާމިޔާބުކޮށްދިނީ އެޓީމުގެ މިޑްފިލްޑަރު ކެންޒާ ޑާލީ އެވެ. މިއީ މޮރޮކޯގެ ޕެނަލްޓީ އޭރިއާ ތެރެއިިން ޑިއާނީ ހުރަސްކޮށްދިން ބޯޅައެއް އެއްފަހަރުން ޖަހައި ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި އޭގެ ދެމިނެޓު ފަހުން އެޓީމުގެ ތިންވަނަ ލަނޑު ޑިއާނީ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ އެޓީމުގެ ފޯވާޑް ޔޫޖިނީ ލޮ ސޮމަރ އެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ފުރާންސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން ފުރާންސް އިން މެޗު ޑޮމިނޭޓުކުރިއިރު، މި މެޗުގައި އެޓީމުން ކާމިޔާބުކުރި ހަތަރުވަނަ ލަނޑު ދެވަނަ ހާފުގެ 70 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް ޔޫޖިނީ ލޮ ސޮމަރ އެވެ. މިއީ އެޓީމުގެ ފޯވާޑް ވިކީ ބެޗޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން ފްރާންސް ކުރީގައި އޮވެގެންނެވެ. މުބާރާތުގެ ކުއާޓާ ފައިނަލުގައި ފުރާންސް ވާދަކުރަންޖެހެނީ އޮސްޓްރޭލިޔާ އާއި ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މި މަހުގެ 12 ވަނަ ދުވަހުގެ މެންދުރު ރާއްޖެ ގަޑިން 12:00 ގައެވެ.