އިރުމަތީ އެފްރިކާގެ ޤައުމެއް ކަމަށްވާ ޔޫގަންޑާގައި އެއްޖިންސުން ގުޅުން ހިންގުމާއި، ޖިންސު ބަދަލު ކުރުމާއި އެއްޖިންސުން ކައިވެނިކުރުން ފަދަ ކަންކަން މަނާކުރުމަށް ބިލެއް އެކުލަވަލައި ފާސްކުރުމުން ވޯލްޑް ބޭންކުން އެޤައުމަށް މާލީ ލޯނު ދޫކުރުން ހުއްޓާލުމަށް ނިންމައިފިއެވެ.

އެމެރިކާގެ ވޮޝިންޓަން ގައި މައި މަރުކަޒު ހުންނަ ވޯލްޑް ބޭންކުން ނެރެފައިވާ ބަޔަނެއްގައި ބުނެފައިވަނީ ޔޫގަންޑާއިން އަލަށް ފާސްކުރި ޤާނޫނާއި ގުޅިގެން އެޤައުމުގައި އުޅޭ އެއްޖިންސުން ގުޅުން ހިންގުމުގެ މި ފާހިޝް ޢަމަލު ހިންގާ މީހުން ބާކީ ވާމިންވަރު ބަލާނެ ކަމަށެވެ. 

ވޯލްޑް ބޭންކުން ނެރެފައިވާ ބަޔާނުގައި ބުނެފައިވަނީ ޔޫގަންޑާއިން އެކުލަވައިލައިފައިވާ އެއްޖިންސުން ގުޅުންހިންގުމާއި ދެކޮޅު ޤާނޫނާކީ އެބޭންކުގެ އުސޫލު ތަކާއި ޚިލާފު ކަމެއް ކަމަށެވެ.

Advertisement

"މިބޭންކުން ޤަބޫލުކުރާ ގޮތުގައި ދުނިޔޭގެ ކަންކޮޅުތަކުގައި ވާ ފަގީރުކަން ނައްތައިލުމަށް ކުރާ މަސައްކަތް ކާމިޔާބުވާނީ، ޖިންސީ ތަފާތުކުރުން ތަކާއި، ނަސްލީ ތަފާތުކުރުންތަކާއި އަދި ޖިންސީ ގުޅުން ހިންގާ ގޮތުގެ ސަބަބުން ގެންގުޅޭ ތަފާތުކުރުންތައް ނައްތާލައިގެން ކަމަށް، އެންމެން ޝާމިލްކުރުމާއި ތަފާތުނުކުރުމަކީ މިބޭންކުގެ އެންމެ މަތީ އެއްއަސާސް" ވޯލްޑް ބޭންކުން ނެރެފައިވާ ބަޔާނުގައި ބުނެފައިވެއެވެ.

އިންސާނީ ހައްޤުތައް ކަށަވަރުކުރުމަށް ކަމަށްބުނެ މަސައްކަތްކުރާ ބައިނަލްއަގްވާމީ ޖަމިއްޔާ ތަކުން ވަނީ ޔޫގަންޑާގައި ފާސްކުރެވުނު މިބިލާއި މެދު ވަރަށް ބޮޑަށް ކަންބޮޑުވުން ފާޅު ކޮށްފައެވެ.

ޔޫގަންޑާއި އިން އެއްޖިންސުން ގުޅުން ހިންގުމާއި ދެކޮޅަށް ފާސްކޮށްފައިވާ މިޤާނޫނުގައި ވަނީ އެ ފާހިޝް ޢަމަލު ހިންގާ ފަރާތްތަކުގެ ތެރެއިން އެ ޢަމަލުން އެހެން މީހަކަށް އެޗްއައިވީ ޖެހިއްޖެނަމަ އެޢަމަލު ހިންގި މީހުންނަށް މަރުގެ އަދަބު ދިނުމާއި، އެ ޢަމަލަށް ހިތްވަރުދޭ މީހުންނަށް 20 އަހަރުގެ ޖަލު ޙުކުމް އިއްވުން ހިމަނާފައިވެއެވެ.

މި ބިލް ފާސްކުރުމާއި ގުޅިގެން ޔޫގަންޑާގެ ރައީސް ޔޮވެރީ މުސެވެނީ ހިމެނޭހެން އެޤައުމުގެ އިސްވެރިންނަށް އެމެރިކާއިން ވަނީ ދަތިކުރުމުގެ ފިޔަވަޅު އަޅައިފައެވެ.

އެއްޖިންސުން ގުޅުން ހިންގުން މަނާ ކުރުމުން ހުޅަނގުން މިފަދަ ދަތި ކުރުމުގެ ފިޔަވަޅު އަޅަން ނިންމާފައިވާއިރު, އެއީ އެކަމުގެ ސަބަބުން ނުރައްކާތެރި އެތައް ކަމެއް ކުރިމަރިކުރުވާ ކަމެކެވެ. އޭގެ ތެރޭގައި ނުރައްކާތެރި އަދި މިހާތަނަށް ފަރުވާއެއް ހޯދިފައިނުވާ އެޗްއައިވީ ފަސޭހަ ކަމާއި އެކު ފެތުރުމާއި، ޖިންސީ ގުޅުމުން އަރާ ތަފާތު އެހެން ބަލިތައް ޖެހުން އާންމުވެއެވެ. 

މީގެ އިތުރުން ހަށިގަނޑުގެ އެކި ގުނަވަން ތަކަށް ޖެހޭ ކެންސަރު ޖެހުމާއި، އެ ނޫންވެސް ގޮތް ނޭނގޭ ބަލިތައް އޭގެ ސަބަބުން ޖެހޭ ކަމެއް ކަމަށް ސިއްޚީ މާހިރުންގެ ދިރާސާތަކުން ދައްކައެވެ.