މަސްވެރިކަމުގެ ސިނާޢަތު ކުރިއަރުވަން ރާއްޖޭގެ ސަރުކާރުތަކަކުން މާބޮޑު ކަމެއްކޮށްފައި ނުވާ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ރިޔާސީ އިންތިޚާބުގެ ކެމްޕޭނަށް ގއ އަތޮޅަށް ކުރައްވަމުން ގެންދަވާ ދަތުރުފުޅުގައި އެއަތޮޅު ދެއްވަދޫގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.

ރައީސް ވިދާޅުވީ މީގެ 45 އަހަރުކުރިން އަޅައިފައިހުރި ފެކްޓްރީއެއް ފެލިވަރުގައި އެބަހުރި ކަމަށާއި،  މީގެ 25 އަކަށް އަހަރު ކުރިން އަޅައިފައި ހުރި މަސްގަނެ ބަންދުކު ކޮށް ގުދަން ކުރާ  ކާރުޚާނާއެއް ކޫއްޑޫގައި  އެބަހުރިކަމަށެވެ.

Advertisement

އެއަށް ފަހު މި ސިނާޢަތް ތަރައްޤީ ކުރުމަށްޓަކައި އެއްވެސް ސަރުކާރަކުން މާބޮޑު ކަމެއް ކޮށްފައެއް ނެތް ކަމަށް ރައީސް ޞާލިޙް ވިދާޅުވިއެވެ.

"އޭގެ ސަބަބުން ސަރުކާރާއި މަސްވެރިންނާއި ދޭތެރޭގައި ބޮޑު ދުރުކަމެއް އެބައޮތް، ސަރުކާރުން އޭރު ވިސްނަމުންދިޔައީ އަބަދުވެސް މި ސިނާޢަތާއި ދުރަށްދާން، މިއީ އަމިއްލަ ފަރުދުން ކުރިއަރުވަންޖެހޭ ސިނާޢަތެއްގެ ގޮތުގައި ދޫކޮށްލަން، އަޅުގަނޑެއް ޤަބޫލެއް ނުކުރަން އެއްޔަކީއެއް އެންމެ ރަނގަޅު ހައްލުކަމުގައެއް" ރައީސް ޞާލިޙުގެ ވާހަކަފުޅުގައި ވިދާޅުވިއެވެ.

ރައީސް ވިދާޅުވީ މަސްވެރިކަމުގެ ސިނާޢަތް ކުރިއަރާނީ އަދިވެސް ސަރުކާރުން މިސިނާޢަތުގެ ތެރޭގައި ބައިވެރި ވެގެން ކަމަށާއި އިންވެސްޓް ކުރަންޖެހޭ އިންވެސްޓް މަންޓުތައް ސަރުކާރުން ކޮށްގެން ކަމަށެވެ.

އަދި އެއަށްފަހުގައި ޕްރައިވެޓް ސެކްޓަރ އާއި އެކު މި ސިނާޢަތް ކުރިއަށް ގެންދެވިދާނެ ކަމަށާއި އެމަނިކުފާނުގެ ސަރުކާރުން ކުރަމުން މިގެންދަނީ އެމަސައްކަތް ކަމަށް ރައީސް ޞާލިޙް ވިދާޅުވިއެވެ.

މީގެއިތުރުން ރައީސް ވިދާޅުވީ މިހާރު ރާއްޖޭގައި ހުރި މަސްގަނެ ރައްކާކުރާ ގުދަންތައް ދެގުނަ ކުރުން އޭގެ ތެރޭގައި ހިމެނޭ ކަމަށެވެ. ރައީސް ވިދާޅުވީ މަހަށް ބޭނުންވާ ހަމައަގު ހޯދައިދެވޭނީ އެގޮތައް މަސައްކަތް ކޮށްގެން ކަމަށެވެ.

ރައީސް ޞާލިޙާއި އެމަނިކުފާނުގެ ކެމްޕޭނު ޓީމުން ގއ ކުރައްވަމުން މިގެންދަވާ ދަތުރުފުޅުގައި އެމަނިކުފާނުގެ ރަނިންގމޭޓު މުޙައްމަދު އަސްލަމް އާއި ކޯލިޝަންގެ ބައިވެރިންވެސް ބައިވެރިވެވަޑައިގަންނަވައެވެ.