އެމްޑަބްލިއުއެސްސީ ދިވެހި ޕްރެމިއާ ލީގުގައި މިހަފްތާގެ އަންގާރަދުވަހުގެ ރޭ ޓީސީ ސްޕޯޓްސް ކްލަބާއި ގްރީން ސްޓްރީޓް ވާދަކުރުމަށް ހަމަޖެހިފައި އޮތް މެޗަށް ގްރީން ސްޓްރީޓް ހާޒިރުވެފައި ނުވާތީވެ، ޓީސީ އެމެޗުން މޮޅުވިކަމަށް ނިންމައިފިއެވެ.
އެފްއޭއެމް އިން މީޑިއާ ގުރޫޕަށް ފޮނުވާފައިވާ މެސެޖެއްގައި ވާގޮތުން މެޗު ފެށުމުގެ ކުރިން ގްރީން ސްޓްރީޓުން ވަނީ މިހާރު މާލޭގައި ހަލުވިކަމާއެކު ފެތުރެމުންދާ ހުމުގެ ރޯގާގެ ސަބަބުން އެޓީމުގެ ގިނަ އަދަދެއްގެ ކުޅުންތެރިން ބަލިވެ އުޅޭތީވެ، އެކަން އެފްއޭއެމް އަށް ވަނީ އަންގާފަ އެވެ.
ނަމަވެސް އަންގާރަދުވަހުގެ ރޭ 21:00 ގައި ފެށުމަށް ހަމަޖެހިފައިވާ މެޗަށް ގްރީން ސްޓްރީޓުން ހާޒިރުވެފައި ނުވާތީ، މުބާރާތުގެ ކޮމެޓީން ވަނީ އެޓީމު މެޗު ދޫކޮއްލިކަމަށް ނިންމައި މުބާރާތުގެ ގަވާއިދުގައި ވާގޮތުގެ މަތިން އެމެޗުން ޓީސީ މޮޅުވިކަމަށް ނިންމާފައެވެ.
މީގެ ކުރިން މިދިޔަ މަހުގެ 29 ވަނަ ދުވަހު ހަވީރު ކުލަބު ވެލެންސިއާ އާއި މާޒިޔާ ވާދަކުރަން ތާވަލު ކުރެވިފައި އޮތް މެޗަށް ވެލެންސިއާގެ ކުޅުންތެރިން ހަމަ ނުވުމުން، އެމެޗު ވެލެންސިއާ އިން ދޫކޮއްލިކަމަށް ނިންމައި މާޒިޔާ މާޒިޔާއަށް ވަނީ ތިން ޕޮއިންޓް ދީފައެވެ.
އެމެޗަށް ވެސް ވެލެންސިއާގެ ކުޅުންތެރިން ހަމަނުވީ ހުމުގެ ރޯގާގެ ސަބަބުން އެޓީމުގެ ގިނަ ކުޅުންތެރިންތަކެއް ބަލިވެ އުޅޭތީއެވެ. އަދި އެކަން އެކުލަބުން ވެސް ވަނީ އެފްއޭއެމް އަށް އަންގާފައެވެ.
Advertisement
This content is created and paid for by advertisers and does not involve Voice Journalists
