ދުބާއީގައި އުޅޭއިރު އެތަނުގެ މަގުތަކުގައި އުޅޭ ސަލާންޖާމީހުންނާއި މެދު ސަމާލުވުމަށް ދުބާއީ ފުލުހުން އިލްތިމާސްކޮށްފިއެވެ.

ދުބާއީގެ ފުލުހުން ޢާންމުންނަށް އިލްތިމާސް ކޮށްފައިވަނީ ޢާންމުކޮށް މަގުމައްޗަށް ނުކުމެ އުޅޭއިރު ސަލާންޖަހާ ފަރާތްތަކަށް އެހީވާއިރު ސަމާލުވުމަށެވެ.

ދުބާއީގެ ސަރުކާރުން މިފަދަ އިލްތިމާސެއް ކޮށްފައިމިވަނީ ދާދިފަހުން ސަލާންޖަހާ ބައެއްކަމަށް ހެދިގެން  އުޅުނު ގްރޫޕަކުން ހިންގި ކުށުގެ ޢަމަލު ތަކަކާއި ގުޅިގެނެވެ. އެމީހުން މިހާރުވަނީ ދުބާއި ފުލުހުންގެ ބެލުމުގެ ދަށަށް ގެންގޮސްފައެވެ.

ދުބާއީ ފުލުހުން ބުނެފައިވަނީ އެމީހުން މިސްކިތްތަކާއި މޯލްތަކާއި ހޮސްޕިޓަލް ތަކުގެ ކުރިމަތީގައި ސަލާންޖަހާ މީހުންގެ ގޮތައް ހެނދުންއަޅައި ތިބޭތަން ފެންނަކަމަށެވެ. އަދި އެމީހުން އެމަސައްކަތުގައި އުޅޭއިރު އަންހެނުންނާއި ކުޑަކުދިން ބޭނުންކޮށްގެން މީހުންގެ ސަމާލުކަން ހޯދަން މަސައްކަތް ކުރާ ކަމަށެވެ. 

އޭޝިޔާގެ ޤައުމުތަކުގެ މީހުން މިކަމުގައި އުޅޭ ކަން ފާހަގަ ވެފައިވާ ކަމަށް ދުބާއީ ޕޮލިހުންގެ މޭޖާ ޖެނެރަލް އަލް ޖައްލާފް  ވިދާޅުވެފައިވެއެވެ.

އޭނާ އިތުރަށް ވިދާޅުވީ މިފަދަ މީހުންނަށް އެހީ ވުމަކީ މުސްކުޅިން އަތުން ފޭރުމާއި، މަކަރު ހަދައިގެން ކުޑަކުދިން އަތުލައިގަނެ އެކުދިން ރަހީނުކުރުމާއި މީހުންގެ އަތުން މަކަރުހަދައިގެން ފައިސާ ހޯދުން ފަދަ ކުށްތަކަށް މަގުފަހި ވާކަމަކަށް ވާތީ އެފަދަ މީހުންނާއި މެދު ސަމާލުވުމަށް އިލްތިމާސް ކުރާ ކަމަށެވެ.

 ދުބާއީ ފުލުހުް ބުނެފައިވަނީ އަވައްޓެރި ޤައުމުތަކުގައި ބޭނުން ކުރާ ނަންބަރު ޕްލޭޓްތައް ވެހިކަލް ތަކުގައި ޖަހައިގެން އެނބުރި ޤައުމަށް ދާން އެހީ ބޭނުންވާ ކަމަށް ހެދިގެން އެ ގްރޫޕުން ސަލާން ޖަހަމުން ދާ ކަމަށެވެ.

އެހެން ކަމުން އަމިއްލަ ސަލާމަތާއި ރައްކާތެރިކަމަށްޓަކައި އެފަދަ މީހުންނާއި މެދު ސަމާލުވުމަށް އިލްތިމާސް ކުރާ ކަމަށް ދުބާއީ ފުލުހުން ބުނެއެވެ.