އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ވެރިކަމުގެ ދެވަނަ ދައުރެއް ލިބިވަޑައިގެންފި ނަމަ ގއ ދާންދޫ ސިއްޙީމަރުކަޒު ހޮސްޕިޓަލަކަށް ބަދަލުކުރައްވާނެކަމުގެ ޔަގީންކަން ދެއްވައިފި އެވެ. 

އެމަނިކުފާނު މިފަދައިން ވިދާޅުވެފައިވަނީ އެމަނިކުފާނު ގއ އަތޮޅުގެ ރަށްތަކަށް ކުރައްވަ ކެމްޕޭނު ދަތުރުފުޅުގައި އެ އަތޮޅުގެ ދާންދޫއަށް ވަޑައިގެން އެ ރަށަށް ކޮށްދެއްވާނެ ކަންކަން ހާމަކުރައްވާ ވާހަކަފުޅު ދައްކަވަމުން ނެވެ. 

ރައީސް ޞާލިހު ވިދާޅުވީ ދާންދޫއަށް އެންމެ ބޭނުންޖެހިފައިވާ އެއް ކަމަކީ ސިއްޙީ ޚިދުމަތް މިހާރަށްވުރެ ފުޅާކުރުން ކަމަށެވެ. އެކަން ކުރުމަށްޓަކައި އެމަނިކުފާނަށް ދެވަނަ ދައުރެއް ލިބިވަޑައިގެންފި ނަމަ މިހާރު ދާންދޫގައި ހުރި ސިއްޙީމަރުކަޒު ހޮސްޕިޓަލަކަށް ބަދަލުކޮށް، ސިއްޙީ ޚިދުމަތް މިހާރަށްވުރެ ފުޅާކުރައްވާނެކަމަށް އެމަނިކުފާނު ވަނީ ވައުދުވެވަޑައިގެންފަ އެވެ. 

އެއާއެކު ރައީސް ޞާލިހު ވިދާޅުވީ އަންނަ ދައުރެއްގައި ދާންދޫގައި ހޮސްޕިޓަލު އަޅުއްވާދެއްވާނެކަމަށް އެމަނިކުފާނު ވައުދުވުމުން ރައްޔިތުން އެމަނކުފާނުގެ ބަހަށް އިތުބާރު ކުރައްވާނެ ކަމަށެވެ. އެއީ ވެރިކަމުގެ 5 އަހަރު ދުވަސް ތެރޭގައި ގިނަ ވައުދުތަކެއް ފުއްދާދެއްވާ ރައްޔިތުންނަށް އެކަން ދައްކާދެއްވާފައި ވާތީކަމަށް ރައީސް ޞާލިހު ވިދާޅުވި އެވެ. 

ރައީސް ޞާލިހުގެ މި ދައުރުގައި ވަނީ ރާއްޖޭގެ 5 ސަރަހައްދެއްގައި ޒަމާނީ ފެންވަރަށް ޓާޝަރީ ޚިދުމަތްދޭނެ 5 ހޮސްޕިޓަލު އަޅުއްވާދެއްވާނެ ކަމަށް ވިދާޅުވެފަ އެވެ. 

އެހެން ނަމަވެސް ތަފާތު އެކި ސަބަބުތަކާއި ހުރެ މިހާތަނަށް އެއިން އެއްވެސް ހޮސްޕިޓަލެއްގެ އަމަލީ މަސައްކަތް މިހާތަނަށް ފެށިފައެއް ނުވެއެވެ.