އެއްޖިންސުން ގުޅުންހިންގުންފަދަ ފާޚިޝް ޢަމަލުތަކަށް ހިތްވަރުދޭތީ ކުވައިތުގައި ބާބީ ފިލްމު ދެއްކުން މަނާ ކޮށްފިއެވެ.
ކުވައިތުން ބާބީ ފިލްމު ދެއްކުން މަނާ ކޮށްފައިވަނީ އެޤައުމުގެ ޢާންމު އަޚްލާޤާއި ޘަޤާފީ ސުލޫކާއި އެފިލްމުގެ މަންޒަރުތަކާއި އަޑުތައް ޚިލާފުވާތީއެވެ.
ކުވައިތުގެ އިންފޮމޭޝަން މިނިސްޓްރީގެ ތަރުޖަމާނަކު ވިދާޅުވެފައިވަނީ ބާބީ ފިލްމަކީ ކުވައިތުގެ ޘަޤާފަތާއި އިޖްތިމާއީ މިންގަނޑުތަކާއި ޚިލާފުވުމަށް ހިތްވަރުދޭ ފިލްމެއްކަމުން އެޤައުމުގައި އެފިލްމު ދެއްކުން މަނާކުރީ ކަމަށެވެ.
ކުވައިތުގެ އިންފޮމެޝަން މިނިސްޓްރީ އިން ވަނީ އޮސްޓްރޭލިޔާގެ ފިލްމެއް ކަމަށްވާ "ޓޯކް ޓު މީ" ވެސް އެޤައުމުގައި ދެއްކުން މަނާ ކޮށްފައެވެ.
ކުވައިތުގެ އިތުރުރުން ލުބްނާންގެ ކަލްޗަރަލް މިނިސްޓްރީ އިންވެސް ދަނީ އެޤައުމުގައި އެފިލްމު ދެއްކުމުގެ ފުރުސަތު ހަނިކުރުމުގެ ގޮތުން ފިޔަވަޅު ތަކެއް އަޅަމުންނެވެ.
ލުބްނާންގެ ކަލްޗަރަލް މިނިސްޓަރ މުޙައްމަދު މުރްތަދާ ވިދާޅުވެފައިވަނީ ބާބީ ފިލްމުން އެއްޖިންސުން ގުޅުން ހިންގުންފަދަ ފާޚިޝް ޢަމަލުތައް ޕްރޮމޯޓް ކުރާ ކަމަށާއި، ބައްޕަގެ ބެލެހެއްޓުމުގެ ދަށުން ނުކުމެ އުޅުމަށް ތާއީދު ކުރުމާއި ކައިވެނި ކުރުމާއި އާއިލާއެއް ބިނާކުރުން ފަދަ ކަންކަން ނުކުރުމަށް ހިތްވަރުދޭ ކަމަށެވެ.
ލުބްނާނާއި ކުވައިތުގެ އިތުރުން ވިއެޓްނާމާއި ޕާކިސްތާނުގެ ޕަންޖާބް ޕްރޮވިންސްގައިވެސް މި ފިލްމު ދެއްކުމުގައި މައްސަލަތަކެއް ވަނީ އުފެދިފައެވެ.
Advertisement
This content is created and paid for by advertisers and does not involve Voice Journalists
