ކުރީގެ ރައީސް، އަދި ޕީޕީއެމްގެ ސްޕެޝަލް އެޑްވައިޒަރ، ޑރ. މުހައްމަދު ވަހީދު ހަސަން މަނިކު ޕީޕީއެމްއިން ވަކިވެވަޑައިގެންފި އެވެ. 

ޕީޕީއެމުން ވަކިވެވަޑައިގެންފައިވާ ކަން އިއުލާން ކުރައްވައި ރައީސް ވަހީދު ކުރެއްވި ޓްވީޓެއްގައި ވަނީ، 10 އަހަރު ވަންދެން ޕީޕީއެމްގެ މެންބަރެއްގެ ގޮތުގައި ހުންނެވުމަށްފަހު އެ ޕާޓީން ވަކިވެވަޑައިގެންނެވުމަކީ ހިތާމަ ކުރައްވާ ކަމެއް ކަމަށް ވިދާޅުވެފައެވެ. 

ރައީސް ވަހީދު ވިދާޅުވީ، އެމަނިކުފާނު ޕީޕީއެމްއާއި ގުޅިވަޑައިގަތީ ގައުމީ ހަމަޖެހުން ގާއިމުކޮށް، އެމަނިކުފާނު ފައްޓަވާފައިވާ ތަރައްގީ ދެމެހެއްޓުމަށް ކަމަށެވެ. އަދި އެމަސައްކަތުގެ ތެރެއިން ވަރަށް ގިނަ ކަންކަން ނިމިފައި ވުމަކީ ނުހަނު އުފާ ކުރައްވާ ކަމެއް ކަމަށާ އެހެން އަދިވެސް ކުރަން ހުރި ކަންކަން ހުރި ކަމަށް އެމަނިކުފާނު ވިދާޅުވި އެވެ. 

"ވަރަށް ވިސްނުމަށްފަހު، ޕީޕީއެމްގެ މެމްބަރު ކަމުންނާއި, ޕާޓީގައި އަދާ ކުރައްވަމުން ގެންދެވި ސްޕެޝަލް އެޑްވައިޒަރުގެ މަގާމުން އިސްތިއުފާ ދިނުމަށް ނިންމައިފިން. ދިވެހިރާއްޖޭގެ ކުރިއެރުމަށް، އަޅުގަނޑުގެ ހުނަރާއި، ތަޖުރިބާ އާއި ޢިލްމުގެ ބޭނުން، ހަމަޖެހުމާއި، ބަދަހިކަމާއި، ތެދުވެރިކަން އޮތް ތަނެއްގައި ބޭނުން ކުރުމަކީ، މުހިންމު ކަމެއް ކަމުގައި އަޅުގަނޑު ދެކެން." ޑރ. ވަހީދު ވިދާޅުވިއެވެ. 

މިއާއެކު ވަހީދު ވިދާޅުވީ ޕީޕީއެމްގެ ހުރިހާ މެންބަރުންނާއި، މި ޤައުމުގެ ރައްޔިތުންނަށް އެމަނިކުފާނުގެ ހިތުގައި އަބަދުވެސް ޚާއްސަ މަގާމެއް ދެވިފައި އޮންނާނެ ކަމަށެވެ. އަދި އެމަނިކުފާނު އަބަދު ވެސް މަސައްކަތް ކުރައްވާނީ ރައްޔިތުންގެ ކުރިއެރުމަށާއި ގައުމުގެ އިސްތިގްލާލީ މިނިވަންކަމަށްޓަކައި ކަމަށްވެސް ވިދާޅުވެފައިވެއެވެ.