އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގައި މިއަދު ކުޅެވުނު ކުއާޓާ ފައިނަލުގެ ދެވަނަ މެޗުގައި 2-1 ގެ ނަތީޖާއަކުން ސްވިޑެން އަތުން ބަލިވެ، ޖަޕާން މުބާރަތުން ކަޓައިފިއެވެ.

މި މެޗުގެ ފުރަތަަމަ ހާފުގައި ސްވިޑެންގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، މި މެޗުގައި ފުރަތަަމަ ލަނޑުޖަހައި ކުރިހޯދީ ވެސް އެޓީމުންނެވެ. މި ލަނޑު ފުރަތަމަ ހާފުގެ 32 ވަނަ މިނެޓުގައި ކާމިޔާބުކޮށްދިނީ އެޓީމުގެ އާސެނަލް ޑިފެންޑަރު އަމަންޑާއެވެ.

މިއީ އެޓީމުގެ ބަޔާން މިއުނިކް ޑިފެންޑަރު މެގްޑަލީނާ އެރިކްސަން ތަނަވަސްކޮށްދިން ފުރުސަތެއްގައި ޖަޕާނުގެ ގޯލް އޭރިޔާ ތެރޭގައި މުޅިން ހުސްކޮށް ފޮނުވާލި ބާރު ހަމަލާ ގޯލްގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ފުރަތަަމަ ހާފުގައި ކުޅުން ނިމިގެންދިޔައީ 1-0 ގެ ނަތީޖާއަކުން ސްވިޑެން ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޖަޕާނުން އެޓީމުގެ ކުޅުން ރަނގަޅުކޮށް މެޗުގެ ކޮންޓްރޯލް ހޯދި ނަމަވެސް، ފަހުހާފުގެ 51 ވަނަ މިނެޓުގައި ސްވިޑެން އިން ވަނީ އެޓީމަށް ލިބުނު ޕެނަލްޓީއެއްގައި އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ މެންޗެސްޓާ ސިޓީގެ ޑިފެންޑަރު ފިލިލްޕާ އެންޖެލްޑަލް އެވެ.

މިއީ ޖަޕާންގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ އެޓީމަށް ދިން ޕެނަލްޓީއެކެވެ.

ނަތީޖާގެ ފަރަގު ކުޑަކުރުމަށް ފަހުހާފުގެ 74 ވަނަ މިނެޓުގައި ޖަޕާނަށް ވަނީ ޕެނަޓީއެއް ވެސް ލިބިފައެވެ. ނަމަވެސް އެޓީމުގެ ފޯވާޑް ރިކޯ ޔުކީ ފޮނުވާލި ޕެނަލްޓީ އަމާޒުވީ ގޯލުގެ ހުރަސް ދަނޑިއަށެވެ. އަދި މެޗުގެ 86 ވަނަ މިނެޓުގައި އެޓީމަށް ލިބުނު ހިލޭ ޖެހުމަކުން ފުޖީނޯ ފޮނުވާލި ބާރު ހަމަލާ ވެސް އަމާޒުވީ ގޯލުގެ ހުރަސް ދަނޑިއަށެވެ.

މި މެޗުގައި ޖަޕާނުން ކާމިޔާބުކުރި ހަމައެކަނި ލަނޑު ނިމެން ތިން މިނިޓަށްވެފައި ވަނިކޮށް ކާމިޔާބުކޮށްދިނީ އެޓީމުގެ މިޑްފީލްޑަރު އޮނޯކާ ހަޔާޝީ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ސްވިޑެން ކުރީގައި އޮވެގެންނެވެ.

މުބާރަތުގެ ސެމީ ފައިނަލުގައި ސްވިޑެން ވާދަކުރަންޖެހެނީ ސްޕެއިން އާއި ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މި މަހުގެ 15 ވަނަ ދުވަހުގެ މެންދުރު ރާއްޖެ ގަޑިން 13:00 ގައެވެ.