ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ބާ ޒޯނުގެ ސެމީ ފައިނަލުގެ ދެވަނަ މެޗުގައި 3-1 ގެ ނަތީޖާއަކުން ވައްކަރު ބަލިކޮށް އަނަންތަރާ އިން މުބާރާތުގެ ފައިނަލުގެ ދެވަނަ ޖާގަ ކަށަވަރުކޮށްފިއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އަނަންތަރާ އިންނެވެ. މިލަނޑު ފުރަތަމަ ހާފުގެ 11 ވަނަ މިނެޓުގައި ކާމިޔާބުކޮށްދިނީ އެޓީމުގެ އަބްދުއް ރަހުމާން ހަމީޒް އެވެ. މިއީ ވައްކަރުގެ ހާފު މެދެންހާ ހިސާބުހުރެ ތިރިތިރިން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުގައި އަނަންތަރާ އިން ކާމިޔާބުކުރި ދެވަނަ ލަނޑު ފުރަތަމަ ހާފުގެ 16 ވަނަ މިނެޓުގައި ކާމިޔާބުކޮށްދިނީ އަބްދުﷲ ރަޝީދު އެވެ. މިއީ އެޓީމުގެ ހަމީޒް ތަނަވަސްކޮށްދިން ފުރުސަތެއްގައި ވައްކަރުގެ ޕެނަލްޓީ އޭރިއާ ބޭރުގައި ހުރެ ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އަނަންތަރާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވައްކަރުން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރި އިރު، މި މެޗުގައި އެޓީމުން ކާމިޔާބުކުރި ހަމައެކަނި ދެވަނަ ހާފުގެ 27 ވަނަ މިނެޓުގައި ކާމިޔާބުކޮށްދިނީ އެޓީމުގެ ހަސަން ނާއިލް ދާއޫދު އެވެ. މިއީ އެޓީމުގެ ފަތިހު ތަނަވަސްކޮށްދިން ފުރުސަތެއްގައި ބޯޅައާއެކު ކުރިއަށް އަރައި ކީއްޕަރުގެ ބޯމަތިން ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗު ނިމެން ދަނިކޮށް ފަހުހާފުގެ 39 ވަނަ މިނެޓުގައި އަނަންތަރާގެ ތިންވަނަ ލަނޑު ކާމިޔާބުކޮށްދިނީ ރަޝާދު އަބްދުލް މަތީން އެވެ. މިއީ އެޓީމުގެ އަހުމަދު ސާޖިދު މުޅިން ހުސްކޮށްލާފައި ޖައްސާލި ބޯޅައެއް ވަރަށް ހަމަޖެހިލާފައި ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން އަނަންތަރާ ކުރީގައި އޮވެގެންނެވެ. މި މެޗުގެ މޭން އޮފް ދަ މެޗަކަށް ހޮވުނީ އަނަންތަރާގެ އަބްދުލް ރަހުމާން ހަމީޒް އެވެ.

މުބާރާތުގެ ފައިނަލް މެޗުގައި މިމަހުގެ 13 ވަނަ ދުވަހުގެ ހަވީރު 16:00 ގައި އަނަންތަރާ ނުކުންނާނީ މިއަދު ކުޅެވުނު ސެމީފައިނަލްގެ ފުރަތަމަ މެޗުގައި 3-2 ގެ ނަތީޖާއަކުން މިލައިދޫ ބަލިކޮށް ފައިނަލުން ޖާގަ ހޯދި ފިނޮޅާއި ދެކޮޅަށެވެ.